د ټولگټو وزارت وايي، د وروستیو ورښتونو او سېلابونو له امله د هېواد یو شمېر لویې لارې د ترافیکو پرمخ تړل شوې وې، چې اوس یې د پاکولو چارې په چټکۍ روانې دي.
له یاد وزارت څخه په خپره شوې خبرپاڼه کې ویل شوي، په غور کې د تېرو ورځو ورښتونو او سېلابونو له امله د چهارصدرې او مرغاب ولسوالیو لارې د لنډمهال او گڼ شمېر نورو نښلوونکو سړکونو کې ترانسپورتي خنډونه رامنځته شوي وو، چې دا مهال یې د پاکولو کار روان دی.
همدارنگه په بدخشان کې هم د تېرو ورځو ورښتونو له امله د بدخشان ـ تخار عمومي سړک په څو بېلابېلو برخو کې د ترافیکو پرمخ تړل شوی و، چې اوسمهال د پرانیستلو کار روان دی.: «همدارنگه د تخار – کلفگان او تخار – فرخار مسيرونو کې د ورستیو ورښتونو په ترڅ کې غر ښوېیدنه را منځ ته شوې وه چې په دغو مسیرونو کې یې ترافیکي خنډونه رامنځ ته کړي وو، چې د حل په موخه یې کار روان دی او دغه راز د نورستان د منډول ولسوالۍ مسیر د غرښویېدنې له امله موقتاً بند شوی دی چې د پاکولو چارې یې روانې دي.»
په خبرپاڼه کې ویل شوي، د هېواد ټولو ولایتونو رئیسانو ته ویل شوي، چې بندې شوې لارې دې ژر تر ژره پرانیزي او د ترافیکي خنډونه دې لرې کړي.