د افغانستان د اوسپنې پټلۍ اداره وايي، تېره اوونۍ د اوسپنې پټلۍ له لارې (۷۳۶۵۷) مټریک ټنه انتقالات شوي دي، چې د حیرتان بندر له لارې (۵۸۲۴۷) ټنه، د آقینې بندر له لارې (۷۳۱۵) ټنه او د تورغونډۍ بندر له لارې (۸۰۹۵) ټنه انتقالات چې ټولټال (۷۳۶۵۷) ټنه نفتي، غیر نفتي او نور مواد دي، هېواد ته وارد او صادر شوي دي.
له یادې ادارې څخه په خپره شوې خبرپاڼه کې ویل شوي، د انتقالاتو له ډلې یوه برخه صادرات دي، په تېره اوونۍ کې (۳۸۳۵) ټنه صادرات شوي، چې لویه برخه یې د انارو جوس او معدني ډبرې دي.: «هر څومره چې د اوسپنې پټلۍ له لارې د صادراتو او انتقالاتو کچه لوړېږي، په هماغه اندازه کاري فرصتونه برابرېږي، ملي عواید زياتېږي او په ټوله کې اقتصادي ثبات، ترقۍ او ځان بسياينې ته لاره هوارېږي.»
یادې ادارې له فغان سوداگرو غوښتي، که غواړي خپل سوداگریز توکي په خوندي، ارزانه او چټکه توگه د اوسپنې پټلۍ له لارې ولېږدوي، نو د اوسپنې پټلۍ سره دې په مرکز او ولایتونو کې اړیکه ونیسي او دوی به یې سوداگریز توکي په خوندي توگه تر خپلو ځایونو ورسوي.:«د افغانستان د اوسپنې پټلۍ اداره هڅه کوي، ترڅو د لا زیاتو انتقالاتو لپاره مناسب شرایط برابر او سوداگرو ته اړینې اسانتیاوې برابرې کړي.»
افغانستان اوسمهال د نړۍ له گڼو هېوادونو سره د اوسپنې پټلۍ له لارې نښلول شوی. اوسمهال د افغانستان کاني ډبرې د ایران له لارې ترکیې ته صادرېږي.