په بهر کې د حماس د سياسي څانګې مشر سامي ابو زهری له الجزيرې ټلويزيون سره په خپلو تازه څرګندونو کې يو وار بيا په اسلامي امت د غزې د دفاع لپاره غږ کړی نوموړي ويلي، تاريخ چوپ نه پاتې کېږي او که اسلامي نړۍ اوس اقدام ونه کړي نو سبا به سخت پښېمانه وي.
ښاغلي زهري همدا راز ويلي چې، صهيونيستي اسرائیل د ملکي خلکو پر کورنیو بمبارونه کوي، عامه وژنه یې پیل کړې او هڅه کوي چې د غزې ولس د لوږې له لارې تر فشار لاندې راولي او تسلیمۍ ته یې اړ کړي.
ابو زهري زياتوي چې، حماس هڅه کوي د اسرائیلو خلاف د فشار ټولې موجودې وسیلې وکاروي، ترڅو داسې یو توافق رامنځته شي چې د فلسطينيانو په ګټه وي.
د حماس غورځنګ د بهرني سياست دې مشر نتنياهو د خپل سیاسي راتلونکي لټوونکی ياد کړی او ټرمپ یې د غزې د خلکو په وژنه کې شريک بللی دی.
نوموړی وايي «حماس به هېڅکله تسليم نه شي، د ولس اراده به نه ماتوي، د تسليمۍ بيرغ به نه پورته کوي، خو د اشغال پر ضد به د فشار ټولې لارې کاروي».
هغه همدا راز عرب او نورو مسلمانو مشرانو ته په خطاب کې ویلي «دا د شرم خبره ده چې د غزې خلکو ته له یوې نيمې مياشتې راهيسې نه ډوډۍ رسېږي او نه اوبه! ولې د نتنياهو غوښتنو ته تسليمېږئ؟ تاسې خو د فشار ډېرې وسیلې لرئ».