د افغانستان د نجات لپاره ملي مجمع چې د خپل جوړښت له لومړیو ورځو یې په منځ کې اختلافاتو درز رامنځ ته کړ، لا پراخ شو او ورځ تر بلې د انشعاب له حالت سره مخ کېږي. ملي مجمع کې په لومړیو کې یې له دوی سره د ګڼ شمېر ډلو د یو ځای کېدو ادعا لرل، له هماغه وخته یو شمېر ډلو فاصله ورسره واخیستل او د بېزارۍ اعلان یې کاوه.
کله چې د ملي مجمع لومړۍ ناسته وه، د مقاومت جبهې په استازیتوب فضل احمد معنوي له لومړیو د دغه شوری له جوړښت او تشکیل سره مخالفت پیل کړ، ځکه په لومړیو کې داسې هم تحلیل کېده چې دغه مجمع د مقاومت جبهې او احمد مسعود د نفوذ کمولو لپاره طرحه شوې وه، د دغه اختلافاتو په دوام د افغانستان د لویدیځي حوزې شوری او د رحمت الله نبیل په مشرۍ د افغانستان د آزادۍ ملي ګوند مخالفت وکړ او د نبیل ګوند لار ترې جلا کړه، ورپسې په مجمع کې د حنیف اتمر له شتون سره اسماعیل خان او یونس قانوني مخالفت وښود، خو اختلافات تم نشول او تر نن ورځې یې راپورونه رسنیز کېږي.
په تازه مورد کې د صلاح الدین رباني په مشرۍ د جمعیت ګوند، د احمد مسعود په مشرۍ د مقاومت جبهې او د یاسین ضیاء په مشرۍ آزادۍ جبهې له نیوکو او اندیښنو سره یو ځای له ملي مجمع څخه د جلا کېدو اعلان وکړ او نور د دغه مجمع غړیتوب نه لري.
جمعیت ګوند او مقاومت جبهې په خپلو جلا، جلا خو یو ډول اعلامیه کې ویلي، چې د دغه مجمع له پیله، د مجمع په اړه جدي سیاسي او تخنیکي ملاحظاتو شتون درلود، همدا راز له تأسیس سره یې هم مهاله د جوړښت، پالیسیو او مدیریتي تګلارې په اړه اندیښنې لرلې، چې زموږ له نظره د یادو شویو ملاحظاتو نه رعایت کول نه د خلکو په ګټه دي او نه د سرپرست حکومت د مخالفو مطرحو جریانونو او سازمانونو د پیاوړتیا سبب ګرځي؛ دغه ډلې د سیاسي او تخنیکي دلایلو له امله له ملي مجمع سره نه دي.
آزادۍ جبهې بیا په یوه جلا اعلامیه کې ویلي، چې هیڅکله د ملي مجمع غړي نه وو او په قاطعیت سره دا موضوع ردوي، خو هغه ډلو سره بیا ملګري دي، چې د سرپرست حکومت په وړاندې مبارزه کوي.
په ملي مجمع کې د جمعیت، مقاومت او آزادۍ جبهې په نوم ډلو شتون د مجمع له پیله اعلان شوی و، خو ولې له دومره اوږدې خاموشۍ وروسته په دغه مجمع کې خپل شتون ردوي یا هم ترې د لار جلا کېدو اعلان کوي!؟ واقعیت دا دی چې په دې وروستیو کې د کورنیو چارو پخوانی وزیر محمد عمر داوودزی د ملي مجمع اجرایوي رئیس وټاکل شو، د نوموړي ټاکنه په دغه مجمع کې له مطرحو ډلو سره د اختلاف رامنځ ته کېدلو او انشعاب لامل ګرځېدلې.
د یادو دریو ډلو جلا کېدل د محمد عمر داوودزي له ټاکنې سره د تازه راپورته شویو اختلافات لومړنی څرک دی، ښايي مجمع د انشعاب او پاشلتیا وروستي حد ته ورسېږي او نور له منځه لاړه شي، ځکه په وړاندې یې په رسنیو کې هم غبرګونونه شتون لري، تر دې چې ځینې ټولنیز فعالان او د نورو ډلو غړي په دغه مجمع تور پوري کوي، چې له سرپرست حکومت سره نږدې اړیکې لري او کار کوي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.