لیکوال: شمس الله شهیر
افغانستان دا دی درې کاله پوره کېږي چې د يو بې نظيره او بې مثاله امنيتي حالت څخه د تيرېدو په حال کې دی؛ داسې بې شانه امنيت او وضعیت چې وروستۍ څو لسیزې یې ساری نه لیدل کېږي.
خو ددې شته تاريخي امنیت د تداوم او ثبات له منځه وړلو لپاره د کال ۲۰۲۱ اګست له ۱۵ وروسته ځينو پردي پالو او د نورو لخوا روزل شويو پروژيي جواسيسو عملاً په بېلابيلو نومونو سره د شر او فساد ډلو اعلان وکړ.
دوی ددې ډولو په اعلان سره د څو موخو ترلاسه کولو په لټه کې شول.
١. په سیمیزه او نړيواله کچه د ځان لپاره د سیاسي، نظامي او مالي ملاتړ ترلاسه کول.
٢. د ولس په مینځ کې د اسلامي نظام د مخالفو اشخاصو په ځان پورې تړل.
٣. په وروستيو څو لسيزو کې د بې نظيره امنیتي وضعیت له منځه وړل.
٤. د واک او قدرت ترلاسه کولو لپاره د بې وسه افغانانو د بچيو قرباني کول.
٥. د هيواد د امنيتي وضعيت له ګډوډولو سره د خپلو بادارانو موخو ته د عمل جامې ور اغوستل؛ او داسې نور بې شماره موخې…
دوی د دې ټولو موخو او معادلو سره د يو څه په تحليل او وړاندوینې کې تېروتلي وو، چې ګواکې د ا.ا.ا لخوا به زموږ په وړاندې داسې په جديت او قوت سره غبرګون او عملي ميدان کې د ځپلو سنګر ونه نيول شي.
دوی داسې درک کوله چې له غرو راښکته شوي، دا په حکومتوالۍ نه خبر خلک به شپږ مياشتې حکومتداري ترسره نشي کړای او همدارنګه د حکومت له کولو سره به ددې وړتيا هيڅ ونه مومي، چې د شر او فساد او نورو ډلو په وړاندې به عملي اقدامات ترسره کړي.
خو د وروستۍ امپراتورۍ ماتوونکو چې د دوی غربي بادارانو ته یې د دوی په غلاميت کې د سر په کاسه کې اوبه ورکړې، د څو واک تږیو تنو مقاومت او په وړاندې یې خنډ جوړول به څه وو.
ا.ا.ا په ډير قوت، قاطعيت او پرېکنده ګامونو سره د دوی ریښې، شومې موخې او په ګران هيواد کې د پرديو د موخو عملي کولو پلانونه په نطفه کې ور خنثی او د ابد لپاره یې د دوی انسجام له منځه یووړ.
په دې قاطعيت او پرېکنده دریځ سره دا دی نن په اثبات رسېږي، چې خیالي د شر او فساد ډلې د هيواد په ټولې جغرافيايې کې يوه لوېشت ځمکه هم د دريو کلنو په تېرېدو سره نه لري.
همدارنګه دوی که په هندوکش، اندارب او يا هم بلې ساحې د هيواد کې سر را پورته کړي، د ا.ا.ا وياړلي ځواک په ډېر قاطعيت او جديت سره دوی د خپل عمل په سزاء رسولي.
افغانان داسې غیور او په اسلام مئین خلک دي چې په هېڅ صورت د شر او فساد په نوم ډلې ټپلې نشي زغملی؛ څوک چې د غرب په کاسه لویان شوي وي، یا د هغوی په اشاره او فرمایش دلته د شر او فساد په نامه فعالیت کوي، هېڅکله به د کامیابي لوری ونه ویني، هرو مرو به د افغانانو په لاسونو د دوی مرۍ قطع کېږي؛ هو! دلته د افغانانو په وړاندې نه شر دوام کولای شي او نه فساد.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.