د هېواد بهرنیو چارو وزارت کابل کې د افغانستان، چين او پاکستان د بهرنيو چارو وزيرانو د ډيالوگ د شپږمې ناستې د ترسره کېدو خبر ورکړی.
دې وزارت په یوه خبرپاڼه کې ویلي، چې په دې ناسته کې د تېرو ناستو پر پرېکړو د بیاکتنې ترڅنگ د درې واړو هېوادونو ترمنځ پر سياسي، اقتصادي او ټرانزیټي برخو کې د اړيکو پر پياوړتيا ټينگار شوی دی.
د خبرپاڼې لهمخې، مولوي امیرخان متقي په دې ناسته کې ویلي، چې سيمه کې په گڼو برخو کې د همکاريو د پراختيا لپاره مختلف فرصتونه راټوکېدلي دي او باور لرو چې موږ او تاسې وتوانېږو له دغو فرصتونو څخه د خپلو هېوادونو په گټه استفاده وکړو.
نوموړي زیاته کړې، چې دغه درې اړخيز ميکانيزم موږ ته د دې فرصت راکوي چې د همکاريو د لا پراختيا پر لارو چارو عملي او متمرکز بحثونه ولرو.
له بل لوري د چين د بهرنيو چارو وزير افغانستان سره د خپل هېواد اړيکې مخ پر وده بللي او زياته کړې یې ده چې د دواړو هېوادونو ترمنځ همکارۍ په گڼو برخو کې پراخې شوې دي
ورته مهال د پاکستان د بهرنيو چارو وزير د درې واړو هېوادونو د بهرنيو چارو وزيرانو ناستهمهمه بللې او دا یې د اړوندو هېوادونو ترمنځ د همکاريو د پراختيا ښه فرصت بللی دی.