د اوبو او انرژۍ وزارت وايي، په کابل ولایت کې د څه باندې ۳۰ مېلیونه افغانیو په ارزښت ۱۱ چکډیمونو د جوړولو چارې پیل شوې.
له یاد وزارت څخه په خپره شوې خبرپاڼه کې ویل شوي، ۱۱ چکډیمونه د کابل په ۱۱ ولسوالیو کې جوړېږي.
په خبرپاڼه کې د اوبو او انرژۍ وزارت د چارسمبالي وزیر عبدالطیف منصور له قوله ویل شوي، چې د دغو پروژو د پلي کولو موخه د اوبو مدیریت، د کرنیزو اوبو چمتو کول او د ځمکې لاندې اوبو پیاوړي کېدل دي.: «ټولټال ۱۱ پروژې به د کابل ولایت په ۱۱ ولسوالیو کې پلي شي، چې د میربچه کوټ په ولسوالي کې د سیاب بالا چکډیم له دې مجموعې څخه لومړۍ پروژه ده.»
په خبرپاڼه کې د کابل والي ملا امین الله عبید له قوله ویل شوي، د خوښۍ ځای دی چې نن افغانستان د کورنیو امکاناتو او د دې وطن د بچیانو په هڅو سره د ابادۍ او سوکالۍ په لور روان دی.
د کابل د سیندیزې حوزې عمومي رئیس حبیب الرحمن حقپال د یادو پروژو له پلي کوونکو غوښتي، چې د پروژو کیفیت دې پوره پام وکړي.
د یادونې وړ ده، چې له دې مخکې هم د اوبو او انرژي وزارت له لوري د کابل ولایت په دریو ولسوالیو کې د چکډیمونو د درې پروژو چارې پیل شوې وې، چې له هغې جملې څخه په گلدرې ولسوالۍ کې یوه پروژه بشپړه او په خاک جبار او سروبي ولسوالیو کې دوې نورې پروژې تر کار لاندې دي.