د کورنیو چارو وزارت مسئولینو د امارتي ادارو د يو کلونو لاسته راوړنو د تشريح په خبري کنفرانس کې وویل: اوسمهال د وزارت ټول فعالیتونه د ستراتېژیک پلان په اساس تنظیم او مدیریت کېږي. د عامه نظم او امنیت د ټینګښت په موخه، د اسلامي امارت د مشرتابه فرمانونه، د محکمو پرېکړې او د وزارت د رهبرۍ لارښوونې، پر وخت تنفیذ او عملي کېږي.
د وزارت مسئولینو زیاته کړه، چې له څلور لسیزو وروسته افغانستان د لومړي ځل لپاره د سرتاسري امنیت شاهد دی، خلک په خوندي او ډاډمنه فضاء کې ژوند کوي، په ډاډه زړه او ارام ذهن له یوه ولایت څخه بل ولایت ته سفر کوي.
د امنیتي ځواکونو د دوامداره او نه ستړې کېدونکو هڅو په پایله کې د هېواد په سطحه، د جرمونو په کچه کې ۳۰ سلنه کموالی راغلی دی. لکه څنګه چې په وروستي یوه کال کې د اختطاف د ۳۸ پېښو په اړه خبر ورکړل شوی او امنیتي ځواکونو یې پر وړاندې ۲۵۰ عملیات تر سره کړي، چې په پایله کې یې ۷۶ تنه سړي تښتوونکي نیول شوي او ۳۴ تنه نور یې له امنیتي ځواکونو سره په نښتو کې وژل شوي دي.
د مسئولینو په وینا، تېر کال کې د ملي پولیسو د دوامداره او نه ستړې کېدونکو هڅو په پایله کې د هېواد په کچه، لوی مذهبي مراسم او ناستې او ملي او مناسبتي ورځې په بشپړ امنیت کې تر سره شوي، چې هېوادوالو په پوره ډاډ سره پکې ګډون کړی دی.
په همدې ډول، د اقتصادي او پراختیایي پروژو د امنیت ټینګښت، د پانګونې لپاره زمینه برابرول، د هېواد د سرحدي پولو ثبت او ارزونه، هېوادوالو ته د خدمتونو وړاندې کول او متوازن انکشاف، په تېر یوه کال کې د وزارت له عمده لاسته راوړنو څخه دي. د یادونې وړ ده، چې د وروستي یوه کال پر مهال ملي پولیسو د ۷۰ زېربنایي پروژو ساتنه کړې ده.
مسئولین زیاتوي، چې د امنیتي ځواکونو د مسلکي کېدو او پیاوړتیا برخه کې اساسي ګامونه اوچت شوي، د ملي پولیسو ښوونیز مرکزونه په ښه ډول تجهیز او ملي پولیس اوسمهال د شریرو عناصرو، د هر ډول شومو موخو او پلانونو د شنډولو وړتیا لري. دغه راز، په تېر کال کې ۴۵۰ تنه محصلین د لېسانس په کچه، د کمیسارۍ او داخل خدمت له پروګرامونو څخه فارغ شوي، د ۳۲۵ ښځو په ګډون، ۶۷۳ تنو د ظرفیت لوړونې پروګرامونو کې برخه اخیستې، ۲۴ زره تنو اساسي، اختصاصي او ساتنمني زده کړې کړي او اوسمهال ۳۲ زره تنه په زده کړو بوخت دي. ۲۰۵۱۵ تنه د افسرۍ او ۱۵ زره او ۶۰ تنه د ساتنمنۍ په بستونو کې ګمارل شوي، همدارنګه ۳۵۵۸۴ سرتېري هم د امنیتي ځواکونو لیکو کې جذب شوي دي.
د وزارت مسئولینو د خپلو خبرو په دوام وویل، چې د اسلامي امارت د مشرتابه د فرمان په صادرېدو سره، د نشه یي توکو د کښت، تولید، قاچاق او استعمال د مخنیوي په موخه، جدي اقدامات تر سره شوي، د هېواد په کچه د کوکنارو کښتونه له منځه وړل شوي، روږدي کسان تر درملنې لاندې نیول شوي او د یادې پدیدې له عاملینو سره جدي او قانوني چلند شوی دی.
د کورنیو چارو وزارت چارواکو څرګنده کړه، چې په وروستي یوه کال کې ۳۶۴۳ ټنه بېلابېل نشه یي توکي کشف او ترلاسه شوي، د نشه یي توکو، الکولي مشروباتو او نشه راوړونکو ټابلېټونو د تولید او پروسس ۷۹۰ کارخونې له منځه وړل شوي، ۱۰۵۶۴ شکمن کسان نیول شوي، ۲۷۸۹۱ روږدي کسان د درملنې مرکزونو ته معرفي شوي او ۱۷۶۵۱ هکټاره ځمکه د کوکنارو له کښت څخه پاکه شوې ده.
د وزارت د مسئولینو په خبره، په تېر کال کې د هېواد په هوایي ډګرونو کې د ۱ میلیون او ۹۵۰ زره ډالرو، ۸۴۵ زره یورو، ۴ میلیونه او ۸۳۰ زره سعودي ریالو او ۱۰۰ زره درهمو، له قاچاق څخه مخنیوی شوی دی. د دې ترڅنګ، ۳۴۴ کیلوګرامه نشه یي توکي او څه باندې یو کیلوګرام سره زر هم کشف او ترلاسه شوي دي او له دې پېښو سره په تړاو ۵۹۱ تنه هم نیول شوي دي.
همدار راز مسئولین زیاتوي، چې د خدمتونو وړاندې کول لکه د پاسپورټونو او ترافیکي اسنادو وېش، د طبیعي پېښو قربانیانو ته رسېدنه، د جرمونو کموالی او د وسلو او وسایطو قانوني کول، د تېر کال په اوږدو کې د دغه وزارت له مهمو کړنو څخه دي.
د مسئولینو په وینا، وروستي یوه کال کې په ټولیز ډول ۱ میلیون او ۷۴۵ زره پاسپورټونه وېشل شوي. پر دې سربېره ۵۰۰ زره راسته اشترنګ موټر په سیستم کې ثبت شوي، چې له دې جملې څخه ۲۵۰ زره موټرو ته موقتي پلېټونه وېشل شوي او د موقتي پلېټونو د وېش لړۍ لا هم روانه ده.
د کورنیو چارو وزارت د معلوماتو پر بنسټ، تېر کال د اسلامي امارت د مشرتابه په مشرۍ د والیانو او لوړپوړو مسؤلینو په ګډون، د همغږۍ غونډه ترسره شوې، چې په کې د مرکزي او ولایتي ادارو ستونزې اورېدل شوي او د محلي حکومتولۍ د پیاوړتیا، غوره خدمتونو وړاندې کولو او له خلکو سره د ښې همغږۍ د تامین په موخه، اړینې لارښوونې شوي دي.