د الجزيرې نړيوال ټلويزيون په خپل يوه تحقيقي راپور کې وايي چې د تېر کال د اکټوبر له اوومې راهيسې د غزې تړانګې په ۳۲۰ ورځنۍ جګړه کې د اسرائیلو بریدونو له امله تر ۴۰ زرو ډېر فلسطینیان شهیدان شوي.
ياد تحقيقي راپور چې بېګا خپور شوی پکې راغلي چې په ۴۰ زره شهيدانو کې شاوخوا ۱۷۰۰۰ ماشومان هم شامل دي؛ چې دا په غزه کې د ټولو ماشومانو ۲.۶ سلنه ده چې اوس شهيدان شوي. د راپور پر بنسټ د اکتوبر له اوومې راهیسې هره ورځ په غزه کې لږ تر لږه ۵۳ ماشومان او ۷۲ نارینه او ښځې د اسرائیلو په بریدونو کې شهيدانېږي او لږ تر لږه ۱۰۰۰۰ کسان تر خاورو لاندې ورک دي چې هغوی هم په شهيدانو حساب دي.
راپور همدارنګه د صهيونيستي اسرائيلو وحشت او د نړۍ خاموشي ته په اشارې ليکلي چې د امريکا په نیویارک ښار کې د میډیسن په نوم يو لوی باغ او د لوبو میدان دی چې شاوخوا د ۱۹۵۰۰ کسانو د ځاېېديو ظرفيت لري خو؛ په غزه کې شهيد شويو کسانو شمیر به د میډیسن باغ دوه چنده ډک کړي. راپور کې راغلي چې که چېرې داسې څه په امريکا کې پېښ وای د دنيا تر ټولو ستر وحشت او نسل وژنه به بلل شوې وه خو اوس ټوله نړۍ غلې ده.
د راپور پر بنسټ د شهيد شويو ۴۰ زره کسانو له ډلې ۱۸،۴ سلنه یې ښځې او ۳۳ سلنه یې ماشومان دي. د راپور په وينا د غزې نفوس د اکتوبر له اوومې مخکې دوه میلیونه حسابېده، چې نږدې نیمایي یې ماشومان وو.
راپور د صهيونيستي اسرائيلو بل وحشت په کتنه کې ليکي چې په غزه کې تر ۵۰۰ ډېر ښوونځي چې د پناه ځایونو په توګه کارول کېږي، د اسرائیلو له خوا په نښه شوي، او بمبارد شوي چې ډېری یې ویجاړ او له منځه تللي دي.
د تېر کال د اکتوبر مياشتې له اوومې راهيسې صهيونيستي اسرائيلو په فلسطين د هوا او ځمکې له لارې بريدونه پيل کړل، چې د ۳۲۰ ورځو تر تېرېدو وروسته لا هم دوام لري او لسګونه زره فلسطينيان یې شهيدان، سلګونه زره ټپيان، او ميليونونه نور یې بې کوره کړل.