د اسرائيلو د «معاريو» په نوم يوې ورځپاڼې د راپور له مخې يو شمېر اسرائيلي سرتېرو خبر ورکړی، چې غزه کې د اسرائيلو روانه جګړه چې له پرلهپسې وژنو، بې رحمه وينه تويولو او بېهدفه تګلارو ډکه ده، د اسرائيلو پوځ د ماتېدو او تجزیې تر پولې رسولی.
سرچينې غزه کې د جنګېدونکو اسرائيلي سرتېرو له قوله ويلي، چې د جګړې بې منطقه دوام د پوځ مورال کم کړی، انضباط یې ګډوډ کړی او نظامي تشې ورځ تر بلې ډېرېږي.
راپور زياتوي چې اسرائيلي اشغالګرو ځواکونو شکايت کړی، چې د نتنياهو کابينه د خپلو سياسي او خيالي اهدافو د تحقق لپاره پوځ قرباني کوي، په داسې حال کې چې لسګونه زره افراطي مذهبي يهوديان (حریديم) له عسکري خدمت څخه معاف ساتل شوي.
د سرچينې په خبره اسرائيلي سرتېري وايي:«د نتنياهو کابينه موږ غزې ته لېږي، خو افراطي مذهبي ټولنې له هر ډول مسؤليته خلاصې دي.»
سرتېرو خبرداری ورکړی، چې دې دوه ګوني چلند په جګړهییزو واحدونو سخت فشار وارد کړی او له سقوط سره مخ دي.
له بل لوري د «ډان ارون» په نوم د غزې په جګړه کې ځای پر ځای شوي اسرائيلي سرتېري د اسرائيلو یدیعوت احرونوت ورځپاڼې ته ويلي:«دا ستړيا لرونکې جګړه پوځ ماتوي او پای به یې د بشپړ سقوط په بڼه وي.»
هغه زياته کړې، د افراطي مذهبي يهوديانو لپاره د عمومي معافيتونو دوام، د عادي سرتېرو پر اوږو فشار زيات کړی دی.
ياده دې وي چې په دې وروستيو کې د اسرائیلو په اشغالګر پوځ کې له پوځي ليکو تېښتې او ځان وژنې هم د پام وړ زياتې شوې دي.