د افغانستان اسلامي امارت د غزې پر رفح ښارگوټي د صهیونیستي رژیم برید غندلی دی.
د اسلامي امارت د ویاند ذبیح الله مجاهد له لوري رسنیو ته په لېږل شوې خبرپاڼه کې ویل شوي، رفح ښارگوټی چې د غزې په جنوب کې وروستی ښار دی او د تېرو شپږو مياشتو جگړو او بمباريو له کبله د غزې له شمال، مرکزي غزې او خان يونس څخه تر ۱.۴ مېلیونه بېکوره شوي فلسطیني مسلمانان پکې په خورا بدو شرايطو کې مېشت شوي او په وېره کې ژوند کوي.«اوس يو ځل بيا د صهیونیستي رژیم یرغلگرو ځواکونو د ټولو نړيوالو اصولو په خلاف په ستر جنايت لاس پورې کړی او پخپلو بېرحمانه بمباريو يې بېگناه فلسطيني مسلمانان هدف گرځولي، د افغانستان اسلامي امارت دغه عمل جنگي جنايت او د فلسطيني مسلمانانو ټولوژنه بولي او یو ځل بیا په اسلامي نړۍ او نورو هېوادونو غږ کوي چې د دې ناورين مخه ونيسي او له هرې ممکنه لارې دې هڅه وکړي چې د غزې محاصره مسلمانانو ته خوراکي توکي، درمل او بشري مرستې ورسېږي.»
د اعلامیې له مخې، له بدهمرغه تر دې مهاله سيمهييز او نړيوال اغېزناک دولتونه ونهتوانېدل چې په غزه کې د صهيونيستي رژيم لهخوا د فلسطینیانو د نسلوژنې مخه ونيسي او په دې اړه د مؤثرو اقداماتو نشتون د دې لامل شو چې صهيونيستي رژيم يو ځل بيا د حماس د سولې وړاندیز رد کړي او د غزې پر مظلومو مسلمانانو وحشي بمبار او ځمکني اشغال ته ادامه ورکړي.
د اسرائیلو صهیونیستي رژیم له پرون راهیسې د غزې پر رفح ښارگوټي ځمکني بریدونه پیل کړي، چې له امله یې گڼو خلکو ته پکې مرگژوبله اوښتې ده.
