د اطلاعاتو او کلتور وزارت د یوې خبرپاڼې په خپرولو سره ویلي، چې نن سه شنبه د بغلان ولايت د اطلاعاتو او کلتور ریاست د ځوانانو چارو آمریت د بېلابېلو ولسواليو له وړیا ښوونیزو مرکزونو څخه ۲۵۰۰ تنه زده کوونکي په بېلابېلو برخو کې د زدهکړو له ترلاسه کولو وروسته فارغ شوي.
خبرپاڼه کې د بغلان د اطلاعاتو او کلتور رئیس مولوي اسدالله مصطفی هاشمي له قوله ویل شوي، چې په یاد شمېر کې زدهکوونکو د وینا فن، پښتو، ریاضي، انګلیسي، سواد زده کړې او کمپیوټر په برخو کې زده کړې ترسره کړې وې.
ښاغلي هاشمي همداراز ویلي، چې دغه ۲۵۰۰ زده کوونکي د پلخمري، مرکزي بغلان، بنو، دهصلاح، پلحصار، خوست، فرنګ او ګزرګاه نور ولسوالیو له ښوونیزو مرکزونو څخه فارغ شوي چې د ۶۰ تنو استادانو لخوا د درېیو میاشتو په مخه روزل شوي دي.
خبرپاڼه زیاتوي، د غونډې نورو برخه والو په خپلو ویناوو کې د اطلاعاتو اوکلتور ریاست د وړیا ښوونیز مرکز له هڅو څخه منننه کړې او د ځوانانو د علمي او فرهنګي وړتیا د لوړولو برخه کې يې د ترسره کېدونکو پروګرامونو څخه د ملاتړ ډاډ هم ورکړی دی.