د ریاست الوزراء اقتصادي معاونیت د يوې ويډيو په خپرولو سره وايي، چې افغانستان دا مهال د اړتیا وړ مالګه په کور دننه تولیدوي او د مالګې پراخ او لوی کانونه لري.
سرچينه زياتوي چې د هېواد په لسو ولایتونو سمنګان، فاریاب، هرات، غور، بلخ، تخار، پکتیا، غزني، کندهار او پروان کې د مالګې کانونه شته او په مسلکي ډول یې د استخراج چارې روانې دي.
د اقتصادي معاونيت په خبره په افغانستان کې دا مهال ۵۳ د مالګې د تولید او پروسس کارخانې فعاليت لري چې ګڼ شمېر هېوادوالو ته پکې د کار زمينه برابره شوې.
د معلوماتو له مخې افغانستان د کال ۳۰۰ زره ټنه مالګې ته اړتیا لري، خو له یادو کانونو په میاشتني ډول ۲۸ زره او په کلني ډول ۳۴۴ زره ټنه مالګه استخراجېږي چې د هېواد اوسنۍ اړتیاووې په بشپړ ډول پوره کوي.
اقتصادي معاونیت همدارنګه ویلي، چې د مالګې د تولید په برخه کې ځان بساینې ته د رسېدو په موخه، له بهره هېواد ته د هر ډول مالګې واردات بند کړي دي.