ارګ پر خپله اېکس پاڼه د هرات ولایت د علماوو شورا د رئیس شیخالحدیث مولوي محمد بشر پر مړینه د خواشینۍ او تسلیت پیغام خپور کړی او نوموړی یې د هېواد د جیدو علماوو له ډلې څخه بللی دی.
په پیغام کې راغلي، چې مولوي محمد بشر د زړه د ناروغۍ له امله وفات شوی او مړینه یې د علمي ټولنې او افغان حکومت لپاره ستره ضایعه ده.
افغان حکومت د نوموړي علمي خدمتونه او د هرات د علماوو شورا د رئیس په توګه فعالیتونه ستایلي او د هغه کورنۍ او خپلوانو ته یې د جمیل صبر او مرحوم ته یې د جنت الفردوس دعا کړې ده.