امریکايي چارواکو تائید کړې، چې د ټرمپ اداره غواړي د امریکا په بازارونو کې د هګیو د بې سارو لوړو بیو د راټیټولو لپاره له ترکیې او جنوبي کوریا څخه سلګونه میلیونه هګۍ واردې کړي او د چارواکو په خبره په دې اړه له نورو هېوادونو سره هم خبرې روانې دي.
د امريکايي رسنيو په وينا، د امریکا حکومت د چرګانو د انفلونزا د خپرېدو پر وړاندې مبارزه کوي، چې په امریکا کې یې لسګونه میلیونه چرګان تلف کړي دي.
د سرچينو په وينا، امريکا کې د هګيو له کمبود سره سم د هګيو بیې د ريکارډ په کچه لوړې شوي او په عادي ډول د يو درجن هګيو بيه ۵ نيم ډالرو ته رسېدلې ده.
له دې ورهاخوا د امريکا د ځينو ايالتونو پوليس وايي چې، د هګيو غلا امريکا کې په نوي بحران بدلېدونکې ده او هره ورځ سلګونه د هګيو د غلا پېښې ثبتېږي.
د بیو کنټرول په اړه د ډونالډ ټرمپ له ژمنې سره سره، د هګیو بیه تېر کال تر ۶۵ سلنې زیاته شوې او داسې ښکاري چې، دا شمېره به په روان کال کې ۴۱ سلنه نوره هم لوړه شي او دا هغه څه دي چې د ټرمپ لپاره یې لوی سر درد جوړی کړی دی.