د کورنیو چارو وزارت خبر ورکړی چې د هلمند امنیه قومندانۍ ترهګرۍ سره د مبارزې مدیریت له تېرې یوې میاشتې راهیسې د دغه ولایت په مرکز لښکرګاه او ولسوالیو کې د پلټونکو عملیاتو پر مهال لسګونه میله وسلې او پوځي تجهیزات کشف او ترلاسه کړې دي.
د خبر له مخې په ترلاسه شویو وسلو او تجهیزاتو کې ۹۰ میله نوې توپنګچې، ۶ میله کلاشینکوفونه، یو کره بین، یو کمر شکن، ۲۰ مخابرې، ۱۸ شاجورونه، یو زر او ۳۴۰ د درنو وسلو مرمۍ، ۳۲۰ د کلاشینکوف مرمۍ، ۶۵ د تومانچې مرمۍ او نور نظامي تجهیزات شامل دي.
کورنیو چارو وزارت زیاته کړې ده، چې نیول شوې وسلې او نظامي تجهیزات له ترهګرۍ سره د مبارزې پولیسو له ثبت وروسته د ډایاک مدیریت ته سپارلي دي.
د یاد وزارت په وینا، امنیتي ځواکونو په دې تړاو ۱۶ تنه نیولی چې د نورو څېړنو په موخه به عدلي او قضایي ارګانونو ته وسپارل شي.