د بهرنیو چارو وزارت په یوه خبرپاڼه کې ویلي، چې د یاد وزارت وزیر مولوي امیرخان متقي د افغانستان لپاره د روسیې د ولسمشر له ځانګړي استازي ضمیر کابلوف سره په لیدنه کې د دواړو هېوادونو ترمنځ د اقتصادي او سوداګریزو همکاریو پر پراختیا او د شته فرصتونو پر اغېزمنې استفادې خبرې کړې دي.
مولوي امیرخان متقي د مسکو او کابل ترمنځ د اړیکو پراختیا د دواړو هېوادونو په ګټه بللې او ټینګار یې کړی چې د متقابلو ګټو پر بنسټ باید سوداګریزې او اقتصادي همکارۍ پراخې شي.
ضمیر کابلوف په افغانستان کې وروستي پرمختګونه ستایلي او د نشهیي توکو پر وړاندې یې د افغان حکومت مبارزه د پام وړ بللې. نوموړي د دې مبارزې په اړه د ځینو نړیوالو ادارو راپورونه له واقعیتونو لرې بللي.
مولوي امیرخان متقي هم د نشهیي توکو د کښت، تولید او قاچاق پر وړاندې د افغان حکومت پر جدي او دوامدارې مبارزې ټینګار کړی او دا هڅې یې د افغانستان او سیمې د امنیت لپاره مهمې بللي.