د عامې روغتیا وزارت وايي، د کابل په اندراگاندي ماشومانو د درملنې روغتون کې د اکسیجن د تولید څانگې د جوړېدو چارې پیل شوې.
له یاد وزارت څخه په خپره شوې خبرپاڼه کې ویل شوي، د اکسیجن د تولید یاده څانگه د روغتیا نړیوال سازمان په مالي او تخنیکي همکارۍ جوړېږي، چې په ۲۴ ساعتونو کې به د ۲۰۰ بالونونو د اکسیجن د تولید وړتیا ولري.
د روغتیا وزارت د روغتیايي خدمتونو د وړاندې کولو مرستیال عبدالولي حقاني وايي، د اندراگاندي د ماشومانو د درملنې په روغتون کې د اکسیجن د تولید څانگې جوړېدل د روغتیايي خدمتونو د کیفیت لوړولو او په هېواد کې د ماشومانو په تېره بیا د هغو ماشومانو روغتیايي ستونزو د حل په برخه کې مهم دي چې اکسیجن ته اړتیا لري.
د اندراگاندي د ماشومانو د درملنې په روغتون کې د اکسیجن یاد پلانټ به د څلورو جنراتورونو په لرلو سره د روغتیا نړیوال سازمان په مالي او تخنیکي همکارۍ جوړ شي، چې په ۲۴ ساعتونو کې به د ۲۰۰ بالونونو اکسیجن د تولید ظرفیت ولري او مرسته به یې د یاد روغتون ناروغانو ته د بشپړ اکسیجن رسولو تر څنگ نورو روغتونونو ته هم د اړتیا وړ اکسیجن استول کېږي.
د هېواد په یو شمېر مهمو روغتونونو کې له دې وړاندې هم د اکسیجن د تولید څانگې فعاله شوې دي، خو لا هم ډېر روغتونونه یاده اسانتیا نه لري او له اکسیجن له نورو روغتونونو او یا هم له بازار څخه اخلي.