د امارتي شرکتونو عمومي ریاست په یوه خبرپاڼه کې ویلي، چې د یاد شرکت عمومي رئیس مولوي احمدجان بلال د ایران د انرژۍ له وزیر عباس عليآبادي سره په لیدنه کې افغانستان ته د برېښنا د لېږد، د تخنیکي کادرونو د روزنې او د انرژۍ په برخه کې د ګډو همکاریو په اړه خبرې کړې دي.
د ایران د انرژۍ وزیر ویلي، هېواد یې چمتو دی چې د افغانستان د برېښنا اړتیاوو د پوره کولو په موخه دغه هېواد ته تر ۲۰۰۰ مېګاواټه پورې برېښنا برابره کړي او د افغان تخنیکي کادرونو د روزنې او مسلکي ظرفیتونو د لوړولو لپاره لازمې اسانتیاوې هم برابرې کړي.
په دې لیدنه کې د دواړو هېوادونو د سفیرانو په ګډون، د برېښنا او انرژۍ، د څښاک د پاکو اوبو رسولو او د فاضلابو د تصفیې د تاسیساتو جوړولو په برخو کې د ګډو همکاریو او اړوندو موضوعاتو په اړه هم بحث شوی.
بلال د انرژۍ په برخه کې د همکاریو پر پراختیا، د تخنیکي ظرفیتونو پر پیاوړتیا او د ګډو پروژو پر عملي کېدو ټینګار کړی او په پای کې یې د تهران د اوبو او فاضلابو له سترو تصفیهخونو څخه هم لیدنه کړې ده.