پر هېواد او ملت باندې د بغاوتګرو زیان او تاوانونه!
د باطلو او ویجاړونکو ډلو ملاتړ کوونکي:
له هغو اساسي او ژوند اخیستونکو زیانونو څخه چې بغاوتګر یې راولاړوي، د باطلو، ویجاړونکو او افراطي ډلو ملاتړ دی؛ دغه ډلې شوم، ناولي او تور اهداف په ذهن کې لري، او د خپلو ناپاکو اهدافو د پوره کولو په لاره کې هر څه ترسره کوي او له هېڅ شي ډډه نه کوي.
په حقیقت کې دوی ټول یو دي؛ یعنې دا کسان داسې ډلې او افراد لټوي چې د دوی په څېر وي، یا حتی تر دوی هم بد او پست کارونه وکړي ترڅو د دوی په لویه ډله کې شامل شي.
دوی ته هدف دا دی چې په هر قیمت سره یو شي او هر ډول چې وي خپل کارونه مخکې یوسي، خو دا ورته مهمه نه ده چې دا یو ځای کېدل به څومره د هېواد او ملت لپاره بدې پایلې ولري او څومره لوی زیانونه او ویجاړتیاوې به رامنځته کړي؛ آن کېدای شي دا د دوی اصلي هدف وي چې خپل هیوادوال او ملت بېکوره کړي او له منځه یې یوسي.
دوی پرته له دې چې ملت او ټولنه په وینو کې ولمبوي او ناامني، بېچارهګۍ او ناامیدي ته لمن ووهي، بل څه نه کوي؛ تر دې هم بدتره، دوی دا ډول سوزونکي، خفقان راوړونکي او دردناکه کړنې د حقیقت، صداقت او مبارزې په رنګ کې وړاندې کوي او د یوه ارمان په توګه یې مطرح کوي چې باید ورته ځان قربان کړي.
یعنې دوی د ظالم او مظلوم ځایونه بدلوي، یعنې ظالم هم ظلم کوي او هم خپل ظلم توجیه کوي چې ګواکې د ټولنې د ثبات، امنیت او اعتدال د راوستلو لپاره ترسره شوی دی، او دا په سلګونو نورو نومونو سره وړاندې کوي.
په دې منځ کې یواځې هېواد له بنسټیز فرسایش(شړېدو) او اقتصادي وروستهپاتېتوب سره مخ کېږي، او ملت هم د زیانونو تاوان له خپلو جیبونو ورکوي او په دې ستونزمنه لار کې هم د ژوند او هم د حیثیت قیمت پرې کوي.
نو له همدې امله ویلای شو چې هر باطل د بل باطل په جذب پسې ګرځي، او دا چې بغاوت کوونکي د خپلو ناسمو موخو لپاره یو ځای کېږي، دوی ته ډېر ممکن او حتی د خوښۍ وړ دي.
دا ښکاره ټولنې او د ویجاړونکو جریانونو روښانه ملاتړونه په هېواد کې پرته له دې چې د وینې تویونې او مالي زیانونو اغېزې یادې کړي، د بغاوت کوونکو شوم اهداف څرګندوي او د دوی اصلي څهره ښکاره کوي.
هرڅومره چې دوی هڅه وکړي خپل ځانونه سپین وښيي، خو د دوی څهره نوره بڼه نه بدلوي او د خلکو اعتماد یې له لاسه ورکړی دی، بلکې په ټولنه کې منفور شوي دي.
یوازې هغه کسان چې له سالم عقل او روښانه لید څخه بېبرخې دي، او د ټولنې روښانه حقایق نه ویني، کېدای شي د دوی له خبرو څخه اغېزمن شي او پرته له دې چې حقیقت وویني، قدم واخلي.
خو د افغانستان شریف ملت اوس حقیقت ته رسېدلی دی او پوهېدلی چې څوک د دې وطن د آبادي او د خلکو د سرلوړۍ لپاره ریښتینې هڅې کوي، او یوازېنی هدف یې دا دی چې د تېر اشغال تورو او تیارو وختونو جبران وکړي، کوم چې وطن یې په ډېرو ستونزو کې ډوب کړی وو.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.