مبصر: محمد فیصل
تېرو دوه او درې ورځو کې د بلوچستان د ازادۍ پوځ لسګونه هغه پنجابیان په نښه او وژلي چې له پنجاب څخه بلوچستان ته روان وو.
د بلوچستان په موسی خیلو ولسوالۍ کې بلوچ وسله والو یو شمېر موټر درولي وو او هغه کسان یې ترې راکوز کړي چې د پنجاب شناختي کارتونه ورسره وو؛ له شناخت وروسته یې یو شمیر وژلي او ګڼو موټرونو ته یې اور اچولی دی.
دا لومړی ځل نه دی چې بلوچ وسله وال دغسې کړنې ترسره کوي؛ له دې وړاندې هم لسګونه ځله دغه ډول پیښې شوي چې ګڼ پنجابیان په کې د بلوچ وسله والو له لوري وژل شوي دي.
د پنجاب ایالتي او د پاکستان مرکزي حکومتونه وایي چې بلوچ وسله وال عام پنجابیان وژني؛ هغه پنجابیان چې د هغوی په وینا بلوچستان ته د کار او مزدورۍ له پاره ځي.
خو بلوچ وسله وال وایي، دوی هغه کسان وژني چې په ساده لباس کې د پاکستان د پوځ او نورو امنیتي ادارو غړي وي او بلوچستان ته د بلوچانو پر ضد کړنو ته ورځي.
بلوچان وایي، پنجابیان د دوی ایالت ته ورځي او د بلوچستان په کانونو خیټه اچوي او هغومره چې لازمه ده، د بلوچانو حقوق په کې نه ورکول کېږي.
بلوچستان د پاکستان تر ټولو لوی خو په اقتصادي لحاظ تر ټولو وروسته پاتې ایالت دی.
بلوچان وایي، پاکستان د دوی طبیعي زیرمې لوټي او پنجاب او نورې سیمې ورباندې ابادوي.
د بلوچستان د ازادۍ پوځ له پاکستان څخه د بیلتون جګړه کوي او هڅه کوي چې د پاکستان، ایران او افغانستان له بلوچو سیمو څخه یو بیل هیواد جوړ کړي.
ویل کیږي چې دغه وسله واله ډله تر درې زرو پورې جنګیالي لري.
د بلوچانو او پاکستان تر منځ د پاکستان له جوړیدو راهیسې تر ننه ستونزه شته؛ بلوچان پاکستان نه مني او وایي چې بلوچستان په زور او چل له پاکستان سره یو ځای کړای شوی دی.
بلوچان په خپل ایالت کې نه یوازې د پاکستاني امنیتي ادارو د حضور مخالفت کوي، بلکې د پاکستان د تر ټولو نږدې متحد چین د پانګونې هم مخالف دي.
تر اوسه په بلوچستان او د پاکستان په نورو سیمو کې په چینایي وګړو ګڼ بریدونه شوي دي چې ډیر شمیر چینایان په کې وژل شوي دي.
داسې ویل کېږي چې چین د پاکستان له امنیتي وضعیت څخه ډاډمن نه دی او همدا لامل دی چې چین په پاکستان کې پانګونې ته زړه نه ښه کوي.
بلوچان چینایانو ته د نویو استعمارګرو او لوټمارو په نظر ګوري. دوی وایي پنجاب او چین په ګډه د دوی د شتمنیو لوټلو له پاره ورځي، نو ځکه دواړه د بلوچانو تر بریدونو لاندې دي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.