تبصره: دوکتور امین الله امیني
د رسنیو د راپورونو پر بنسټ امریکا او ازبکستان موافقه کړې چې د ۲۰۲۱م کال د اګست په ۱۵مه له افغانستانه تښتول شوې الوتکې ازبکستان ته ورکوي.
د امریکا متحدو ایالتونو او ازبکستان په دې سره موافقې ته رسېدلي چې د ۲۰۲۱م د اګست په ۱۵مه د افغان پیلوټانو له لوري تښتول شوې پوځي الوتکې ازبکستان ته پرېېښودل شي.
جاناتن هینک په ازبکستان کې د متحدو ایالتونو سفیر ازبک کان خبري اژانس ته تائید کړې چې متحد ایالتونه او ازبکستان د افغانستان د تېر پرځېدلي نظام د ملي اردو د هوايي ځواک جنګي جېټ الوتکو او پوځي څرخکو د وضعیت په اړه هوکړې ته رسېدلي دي.
له سفیرهینک څخه یوه پوښتنه مطرح شوې: ایا د افغانستان الوتکې به په ازبکستان کې پاتې شي؟ هینک د پوښتنې په جواب کې ویلي:”پوځي وسایط به په ازبکستان کې پاتې شي، په دې مخکې لا موافقه شوې ده”.
هینک رسنیو ته دا هم ویلي:«فعلاً چې په ازبکستان کې کوم وسایط حضور لري، هیڅکله د افغانانو نه وو، بلکې په امریکا پورې یې تړاو درلود».
د اګست په ۱۵مه چې، اسلامي امارت د افغانستان بشپړ کنټرول ترلاسه کړ، افغان پیلوټانو ګڼ شمېر جنګي الوتکې او پوځي چورلکې ازبکستان او تاجکستان ته وتښتولې چې لا هم په دغو دوو هېوادونو کې دي.
بلخوا د اسلامي امارت د ویاند مرستیال حمدالله فطرت وایي چې، په دې وروستیو څو ونیو کې اسلامي امارت ښه ډېپلوماټيک پرمختګونه لرلي دي.
ښاغلی فطرت په متحده عربي اماراتو کې د اسلامي امارت د سفیر منل کېدل او په قزاقستان کې د اسلامي امارت د شارزدافیر معرفي کېدل او هېواد ته د ازبیکستان د لومړي وزیر سفر له ښو ډپيلوماټیکو پرمختګونو یاد کړي دي؛ فطرت زیاته کړې چې، دا د دې څرګندونه کوي چې، د اسلامې امارت بهرنی سیاست د پراختیا په درشل کې ده.
په تېره یوه میاشت کې د اسلامي امارت لوړ پوړي چارواکو هم ایران، قطر او متحده عربي اماراتو ته سفرونه کړي دي.
له چین وروسته متحده عربي امارات دویم هیواد وو چې، د اسلامي امارت د سفیر په توګه يې د بدرالدین حقاني باورلیک ومانه؛ د چارواکو په وینا، تر اوسه په نورو هیوادونو کې د اسلامي امارت نږدې څلوېښت استازولۍ فعالې دي.
شنونکي وايي، دا چې امریکا له افغانستانه تښتول شوې الوتکې ازبکستان ته ورکوي، دا په دې معنی ده چې، امریکا اوبه خړوي، خپله پکې ماهیان نیسي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.