د بلوڅ بېلتونپالې ډلې (بياېلاېف) د یوې خبرپاڼې په خپرولو سره ویلي، چې د «بام» په نوم پوځي عملیات یې، چې د جولای له ۹ تر ۱۱ نېټې پورې یې دوام وکړ، له بشپړې بریا سره پای ته رسولي دي.
د خبر پاڼې له مخې، په دې موده کې دوی په ټول بلوچستان کې ۸۴ بریدونه ترسره کړي، چې په ترڅ کې یې د پاکستان د بېلابېلو امنیتي ادارو لږ تر لږه ۵۹ تنه وژل شوي او تر ۵۱ ډېر ټپیان شوي دي.
د یادې ډلې په وینا، په دې عملیاتو کې یې یو شمېر موبایل ټاورونه، نقلیه وسایط، ډرونونه، یو بانک او یو دولتي بس هم له منځه وړي دي.
پاکستاني چارواکو تر دې مهاله په دې تړاو څه نهدي ویلي.