د عامې روغتیا وزارت په یوه خبرپاڼه کې ویلي، چې د تخار ولایت په ورسج ولسوالۍ کې د ۵۹ میلیونه افغانیو په لګښت د یوه مجهز عمومي روغتون د بنسټ ډبره کېښودل شوه.
د عامې روغتیا وزیر مولوي نورجلال جلالي د دغه روغتون د بنسټ ډبرې د اېښودلو پر مهال ویلي، چې د دغه روغتون په جوړېدو سره به د ورسج او شاوخوا سیمو د اوسېدونکو روغتیايي ستونزې کمې او معیاري روغتیايي خدمتونو ته به یې لاسرسی اسانه شي.
هغه زیاته کړې، چې د عامې روغتیا وزارت په ټول هېواد کې د ۳۱۸ ولسوالیو لپاره د عمومي روغتونونو د جوړولو لړۍ پیل کړې، ترڅو هېوادوالو ته په خپلو سیمو کې باکیفیته روغتیايي خدمتونه وړاندې شي.
د وزارت د معلوماتو له مخې، یاد روغتون به د اکسیجن مرکزي سیستم او پولیکلینیک ولري او ساختماني چارې به یې په ۱۸ میاشتو کې بشپړې شي.