خبر:
د افغانستان د بیارغونې په چارو کې د امریکا د سرمفتش دفتر یا سیګار په یوه تازه راپور کې د امریکا کانګرس ته وړاندیز کړی، چې په راتلونکي سپټمبر کې دغه اداره خپل فعالیت پای ته رسوي. په دغه درې میاشتني راپور کې چې نړیوالو رسنیو ته لېږل شوی، سیګار د خپل فعالیت د بندولو د وړاندیز لامل له افغانستان سره د امریکا د مرستو کمېدل ښودلي دی.
په راپور کې د دې ادارې د مشر جان سوپکو له خولې ویل شوي: «د ادارې د تړلو لپاره زما وړاندیز جیو پولیټیک واقعیتونه منعکس کوي، دا چې طالبانو واک اخیستی او ورسره له افغانستان سره د امریکا مرسته کمه شوې ده.»
تبصره:
د افغانستان د بیارغونې په چارو کې د امریکا د سرمفتش دفتر یا سیګار په نوم امریکايي اداره چې پر افغانستان د امریکايي ښکېلاک له یرغل سره سم یې فعالیتونه پیل کړل، په خپله نږدې دوې نیمې لسیزې توره، ناکامه او بدنامه دوره کې یې د افغانستان په اړه ګڼ راپورونه خپاره کړل.
دا اداره د ګڼو نورو موخو ترڅنګ د افغانستان، افغانانو او په ځانګړې توګه په افغانستان کې د امریکا ضد افرادو او خوځښت پر ضد د تبلیغاتي جګړې، د ناسمو ارقامو د خپرولو، د تورونو لګولو، چل، فرېب د تورو او کړغېړنو څېرو د سپینولو او دغه راز د سپېڅلو څېرو د تور ښودلو لپاره رامنځته شوې وه.
که څه هم په ښکاره توګه دې ادارې ته داسې نوم ورکړل شوی و، چې ګواکې په افغانستان کې پر امریکايي مرستو څارنه کوي، خو د دې ادارې اصلي دنده دا وه، چې تر دې نامه لاندې د اشغال خلاف ذهنیتونه بل لور ته واوړي او دغه راز نړیوالو ته داسې وښيي چې ګواکې امریکايي او نور تېري کوونکي په افغانستان کې د جګړې، ورانیو او تباهیو پر ځای هلته د بیارغونې او جوړونې کارونه پر مخ وړي.
که څه هم دا ټولو ته ښکاره ده، چې امریکا پر افغانستان په یرغل سره، د نورو برخو ترڅنګ دغه هېواد ته لسګونه میلیارده ډالره زیان ورساوه، د افغانستان سترې زېربنايي پروژې او تاسیسات یې ونړول او ګڼ نور مالي او اقتصادي تاوانونه یې ورته واړول، خو دې استخباراتي او تبلیغاتې ادارې تل هڅه کوله، چې له دې چارې د خلکو او نړۍ ذهنیت بل لور ته واړوي او ذهنونه پر هغو ناکاره او ناکامه امریکايي پروژو ور متمرکز کړي، چې له یوې خوا به رشوتونو او فسادونو ډکې وې او له بلې خوا به یې کیفیت دومره ټيټ و، چې ان څو میاشتې به یې دوام نه کاوه.
دې ادارې د خپلو نورو شومو او ناوړه فعالیتونو ترڅنګ په افغانستان کې د امریکا پر وړاندې د درېدلو کسانو په اړه هم ضد و نقیض راپورونه خپرول، کله یې میلیاردران معرفي کول، کله به یې د قاچاقو په څېر نور بې ځایه او بې اساسه تورونه لګول او کله به یې بیا په فساد او رشوت ککړ امریکايي تور قراردادیان سپین معرفي کول، نو له همدې کبله یې د سي آی اې، د امریکا د کانګرس او نورو جرمي شبکو او بنسټونو کلک ملاتړ له څانه سره درلود او د تبلیغاني جګړې د یوې مهمې مهرې په توګه یې ترې کار اخیست.
دې ادارې په تېرو نږدې دریو کلونو کې هم د افغانستان، افغانانو او د دوی د اوسني نظام پر وړاندې پراخ تبلیغات وکړل؛ دا اداره او د دې ادارې چارواکي چې په افغانستان کې د امریکايي اشغال د ټغر له ټولېدو وروسته بې مضمونه شوي وو، د افغانستان پر وړاندې یې خپل ناسم معلومات او پروپاګند ته لا زور ورکړ، د خیالي شمېرو او ارقامونو په خپرولو به یې کله تور پرې کاوه چې افغانستان لا هم د نشه يي توکو مرکز دی، کله یې تور پورې کاوه چې په افغانستان کې خلک له لوږې مري، کله به یې یو او کله به یې هم بل تور پورې کاوه.
خو د دوی تورونه دا ځل دومره بې اغېزې شوي وو، چې هېچا هم پرې باور نه کاوه او دا اداره پر یوې فلج او ناکاره ادارې بدله شوه، نو ځکه امریکايي استخباراتي ادارې، کانګرېس او نورو ترې لاس واخیست او اوس یې د تړلو تکل کړی دی.
د دې ادارې بندېدل له یوې خوا د یوې ناکامې او بدنامې پروژې پای دی او له بلې خوا هغو خلکو، کسانو، بنسټونو او ادارو ته لوی پیغام دی چې ځانونه یې لا هم د امریکايي موخو لپاره تابع ګرځولي، په شعوري او غیر شعوري توګه د تبلیغاتو په صف کې ولاړ دي.
امریکا دوی یوازې د خپلو شومو ګټو او موخو لپاره کاروي او هره ورځ یې چې امریکايي ادارو ته په درد ونه خوړل، بیا ترې لاس اخلي او همداسې یې له هرڅه غورځوي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.