د جمهوریت حکومت د دورې تښتېدلي رهبران چې په تېرو دریو کلونو کې یې ونشو کولی د سرپرست حکومت په وړاندې د غربي هېوادونو ملاتړ ترلاسه کړي او ترې ناهیلي شول، اوس د هغو هېوادونو دروازې ټکوي چې پخوا یې د سرپرست حکومت بې قید او شرطه ملاتړي بلل او تور یې پورې کاوه چې د دې هېوادونو تر قوماندې لاندې دي.
په دې وروستیو کې ځینې راپورونه وایي، چې د سرپرست حکومت د مخالفو ډلو مشران، د قدرت او مقام د ترلاسه کولو په موخه، هڅه کوي چې د افغانستان خاوره پر پاکستان وپلوري. ویل کېږي چې د مقاومت جبهې لوړپوړو مشرانو په تاجکستان کې د پاکستان د استخباراتو له مشر سره هم لیدلي وو او له هغه یې غوښتي چې د افغانستان د اوسني حکومت پر ضد، له دوی څخه سیاسي او نظامي ملاتړ وکړي.
یادو مشرانو استدلال کړی، پاکستاني طالبان چې د پاکستان دولت ته جدي ګواښ بلل کېږي، د افغانستان د طالبانو یوه څانګه ده. دوی پاکستان ته ویلي که د طالبانو حکومت ړنګ شي، نو ټي ټي پي به هم ورسره کمزورې شي، نو باید د طالبانو پر ضد زموږ ملاتړ وکړئ.
د پاکستان د استخباراتو مشر د دې ملاتړ په بدل کې له مقاومت جبهې څخه د ډیورند کرښې په رسمیت د منلو غوښتنه کړې. راپورونه ښيي چې دغه پلاوي د آی اس آی له مشر سره په ځینو شرایطو هوکړه کړې او ژمنه یې کړې چې که دا شرطونه عملي شي، دوی به د ډیورند کرښه په رسمیت وپیژني. لاهم روښانه نه ده چې د دې معاملې پټ شرطونه څه دي، خو د مخالفو ډلو بد وضعیت ته په کتو، داسې ښکاري چې دا شرطونه به په پاکستان کې تښتېدلو مشرانو ته د خوندي ځایونو برابرول، د جنګیالیو د جذب مرکزونه جوړول، د سرپرست حکومت پر ضد سیاسي فشارونه او دا معامله له افغان ولس څخه پټ ساتل وي.
د افغانستان تاریخ ګواه دی او تجربو ښودلې چې د دې خاورې پر سر هره کېدونکې معامله له ماتې سره مخ شوې او معامله کوونکي یې تل رسوا، تور مخ او شرمېدلي دي. دې ډلې د سرپرست حکومت د تأسیس له لومړۍ ورځې، د دې حکومت مشران د پاکستان د استخباراتو لاسپوڅي بلل او ویل یې چې طالبان د آی ایس آی تر قوماندې لاندې جنګېږي.
اوسنيو بدلونونو بیا وښوده چې د دې خاورې اصلي بچیان د افغانستان د اوسني حکومت مشران دي. هغوی چې افغانستان یې یو ځل پر ناټو وپلوره، اوس د پاکستان له استخباراتي ادارې سره پر ډیورند کرښې د معاملې په هڅه کې دي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.