د احصایې او معلوماتو ملي اداره وايي، د وگړو د احوال ثبتولو خدمتونو ریاست د روان کال په غويي میاشت کې په کابل ښار کې ۱۰ زره او ۹۵۰ کسانو ته د زېږون کارتونه وېشلي دي.
له یادې ادارې څخه په خپره شوې خبرپاڼه کې ویل شوي، ریاست په کابل ښار کې تېره میاشت ۵۸۳۱ تنو ته د نوې او مثنی پېژندپاڼو د وېش او کاغذي پېژندپاڼو د لغوه کولو، ۷ زره او ۱۱۷ تنو ته د کاغذي پېژندپاڼو د تایید خدمتونه او ۲۶۸۲ نورو کسانو ته د تذکرو اړوند غیرحضوري خدمتونه وړاندې کړي دي.
«همدارنگه د نفوسو د احوال ثبتولو خدمتونو ریاست په غويي میاشت کې ۱۰ زره او ۱۲۸ کسانو ته په کاغذي تذکرو کې د اصلاحاتو د راوستو خدمتونه وړاندې کړي او د دې ترڅنگ د خدماتي څانگو له لارې ۳۹۴ نورو کسانو ته د مړینې پارچې هم وېشل شوي دي.»
د خبرپاڼې له مخې، د احصايې او معلوماتو ملي ادارې د نفوسو د احوال ثبتولو خدمتونو رياست په حضوري او غيرحضوري ډول د کاغذي تذکرو، زېږون کارتونو او د مړينې پارچو د وېش؛ د هېواد د هوايي ډگرونو او ځمکنيو رسمي بندرونو له لارې د بهرنيو وگړو د تگ راتگ د ثبت مسوليتونه پر غاړه لري او په يادو برخو کې هېوادوالو ته د چټکو او رڼو خدمتونو وړاندې کولو ته ژمن دی.