د جمهوریت له پرځېدو وروسته، پخواني چارواکي، چې د ملت له زوال سره نهبیلېدونکې اړیکه لري، ځانونه د قربانیانو او حتی د قهرمانانو په توګه معرفي کوي او په همدې لړۍ کې د ځان ښودنې هڅه هم کوي. دا هڅې، که څه هم په سطحي بڼه هېڅ ښکاري، خو په حقیقت کې د ملت پر حافظې حمله او د هېواد د تاریخ تحریف دی، دوی غواړي پر خپلو تېرو ناکامیو، فساد او خیانتونو سترګې پټې او بیا ځانونه د ولس په وړاندې د قهرمانانو په توګه معرفي کړي.
د جمهوریت پرځېدل د همدې چارواکو د ناکامو پالیسیو، ځانمحورۍ او ولس منزوي کولو مستقیمه پایله وه. د عدالت نشتوالی، پراخ اداري فساد، قومي تعصب او پر بهرنیانو تکیه کول هغه عوامل وو چې دغه نظام یې له ولسه جدا کړ. کله چې د رژیم مشرانو د ولس پر ځای یوازې خپل جیبونه ډک کړل، نظام د ولس له زړونو ووت او نفرتونه یې په وړاندې وپارېدل.
د پرځېدلي جمهوریت مشروعیت صوري(نمایشي) و. د ټاکنو پر مهال درغلي، د رایو پېرود، فامیلي مقررۍ او د پردیو له خوا سیاسي مداخلې د دې سبب شوې چې ولس له جمهوري رژیم زړهتوری شي. د ځینو چارواکو لپاره قدرت یوازې یو شخصي امتیاز و، نه یو ملي مسؤلیت. خو نن همدا اشخاص هڅه کوي د ناکام جمهوریت له کنډوالو، ځان ته د اتلولۍ ماڼۍ جوړې کړي.
همدا پخواني چارواکي، چې د ولس د پرونیو ناکامیو مسؤلیت یې پر غاړه درلوده، ځانونه د افغانستان د تاریخ له مثبتو، کارنده او قهرمانو څهرو څخه څرګندوي، دا د هېواد د پاک تاریخ تحریف دی، دوی غواړي په شعوري ډول خپله ملامتیا کتمان او ځان بې ګناه وښيي او له دې لارې بیا، بیا په افغانستان کې د شل کلنو ناخوالو پړه پر نورو واچوي.
ولس باید درک کړي چې جمهوریت ځکه ونړېد چې بنسټونه یې کمزوري وو او دا نن چې جعلي قهرمانان ځانونه سپينوي، همدوی یې واقعي او حقیقي مسؤلین دي، دوی ته د شخصي ګټو په وړاندې اسلامي او ملي ګټې هېڅ وې او ارزښت یې نه ورکاوه. ولس باید د قهرمانانو او مفسدینو ترمنځ کرښه روښانه وساتي او بیا ځل په هغه جعلي قهرمانانو ونه غولېږي، چې له ولسه یې د شخصي ګټو د تأمین لپاره استفاده وکړه.
افغان ولس لا هم هماغه د شلو کلونو زیانونه نه دي جبران کړي، لا هم د هغه زوال له ګردابونو نه دی راوتی، کوم چې د همدې جعلي قهرمانانو په توسط رامنځ ته شو. نن چې دوی د قهرمانۍ دعوې کوي، باید د افغان ولس له حافظې ونه وځي چې دوی د کومو فاجعو مسؤلین وو. جعلي اتلان باید افشاء شي، د ولس حافظه باید له تحریف څخه وساتل شي. نوي او راتلونکي نسل ته د دروغو په ځای حقیقت وړاندې او اګاه شي، ترڅو بیا د افغانستان پر مجاهد پروره خاوره جعلي اتلان، خائنین او مفسدین واک ته پرېنږدي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.