حماس جهادي غورځنګ په يوه اعلاميه کې د نړۍ د خلکو له لوري، د غزې د محاصرې، بریدونو او لوږې پر ضد مبارزه ستايلې ده.
ياد غورځنګ همدا راز له خلکو غوښتي، چې د صهیونیستي یرغل او نسلوژنې پر ضد خپل ولسي حرکتونه نور هم زیات او دوامداره کړي.
او پر دې سربېره یې يوځل بيا په نړيوالو او ښکېلو اړخونو غږ کړی، چې د غزې سرحدي لارې بايد خلاصې شي، بېړنۍ مرستې داخلې شي او جګړه ژر تر ژره ودریږي.
حماس غورځنګ دغه راز له خلکو غوښتي، چې د اشغالګرو او د هغوی ملاتړو هېوادونو سفارتونو مخې ته لاریونونه وکړي.
په پای کې یې ویلي، چې دا د ازادۍ نړیوال خوځښتونه، عدالت او د صهیونیستي جنایتونو پر ضد د خلکو دریځ ښيي.