خبريال او ټولنيز فعال ميرويس افغان د امريکا د اطلاعاتي ادارو کلني راپور ته چې پکې د افغانستان خاوره امريکا ته ګواښ نه پېښېدونکې ياده شوې په اشارې ويلي، چې دا راپور پر افغان خاوره د هر ډول بريد په مخنيوي کې مرسته کوي او د نوموړي په وينا د پاکستان هغه ادعا دروغ ثابتوي چې ګواکې په افغانستان کې ترهګرې ډلې فعاليت لري.
نوموړي همدا راز ويلي که څه هم پاکستان له بېلابېلو لارو پوره هڅه وکړه، چې سږکال افغانستان د ترهګرو د ځالې په عنوان معرفي کړي خو ونه توانېده او دا شوم پلان او لوبه یې ناکامه شوه.
ميرويس افغان زياتوي «داسې ښکاري چې د امریکا له نوي حکومت سره د طالبانو اړيکې مخ په پراخېدو دي او دا کار به په افغانستان کې یو ځل بیا رغنیزو پروژو او پراخو مرستو ته لار پرانیزي. له امریکا سره د افغانستان د اوسني حکومت اړيکې د افغانستان په ګټه؛ خو د ایران، چین، روسیې او پاکستان په زیان دي؛ ځکه دا هېوادونه هڅه کوي چې د اړېکو مزي وشلوي».
ياده دې وي چې د امريکا استخباراتي ادارو پرون په خپل کلني راپور کې د افغانستان نوم په هغه لېست کې نه دی خپور کړی چې امريکا ته ترې ممکن ګواښ پېښېدای شي.