سلطان محمود غزنوي رحمه الله د یو اسلامي لښکر مشري کړې، د مظلومو ولسونو، په ځانګړې توګه مسلمانانو د نجات او ازآدۍ لپاره یې واقعي هڅې کړې دي، د اسلامي واکمنۍ د پراخېدو لپاره نوموړي له افغانستانه د فتحو لړۍ پیل کړې وه او ستر ویاړونه یې خپل کړي دي.
د سلطان محمود غزنوي امپراتوري د مسلمانانو د واکمنیو په لړ کې خورا تاریخي ارزښت لري، د امپراتورۍ ختیځ حدود یې له شمالي هند(ګنګا سیند حوزې) څخه پیل، په لویدیځ حدودو کې تر فارس او خراسان پورې، په شمالي حدودو کې تر منځنۍ آسیا(سمرقند او بخارا) او په جنوبي حدودو کې تر پنجاب او ګجرات پورې غځېدلي وو او دغه سیمې یې تر واک لاندې یې راوستلي وې، په یادو سیمو کې د اسلامي تمدن د خپرېدو دغه زرینه دوره د همدې سلطان، بت ماتونکي او فاتح په واکمنۍ کې تېره شوې ده.
د سلطان محمود غزنوي تر ټولو ستره جګړه د سومنات په نوم یادېږي؛ نوموړي ته معلومات رسېدلي وو چې د سومنات په ښار کې تر ټولو لویه بت خانه ده، له همدې امله یې درې سوه زره عسکرو له ملتان او اجمیر څخه پر سومنات برید وکړ، دا چې هندیانو ته یې ارزښت درلود، سخت مقاومت یې وکړ، خو مقاومت یې مات او اسلامي لښکرې بریالۍ شوې، سلطان محمود غزنوي د سومنات بت مات کړ، په دې سره یې د بت ماتونکي لقب یووړ او د بت خانې قیمتي ډبرې یې د خپلې واکمنۍ مرکز ته را انتقال کړې.
هندي تاریخ لیکونکي کټ – مټ لکه خواجه آصف، سلطان محمود غزنوي یرغلګر او لوټمار نوموي او په څرګندو ټکو یې په تاریخي کتابونو کې د نوموړي تاریخي واقعاتو ته له منفي زاویې کتلي دي؛ خو سلطان محمود غزنوي رحمه الله د مسلمان اُمت لپاره یو اتل او د جهادي بریاوو سمبول دی، د هغه تاریخي جګړې، په ځانګړې توګه د سومنات بت له منځه وړل په اسلامي تاریخ کې د بت پرستۍ په وړاندې د مبارزې بېلګه ګڼي.
د پاکستان او هندوستان د خونړیو جګړو، د پاکستان د ستري ماتې او لسیزو پټو او ښکاره کړکېچونو له امله د دواړو هېوادونو سیاسي اړیکې خړې پړې دي، پاکستان همېشه هڅه کړې چې له هند سره اړیکې ښې کړي، خو دغه اړیکې تنها هغه وخت ښه کولای شي چې په داخلي او بهرني سیاست کې د هند ملاتړ وکړي او ځان له بېلابیلو اړخونو نږدې وښيي.
د پاکستان دفاع وزیر خواجه آصف د پاکستان د کورني ثبات، له هند سره د بهرني سیاست په برخه کې د پرمختګ او د سلطان محمود غزنوي په جګړو کې د ځپل شویو هندیانو د رضایت لپاره داسې ګستاخانه او له تاریخي واقعیته لیري څرګندونې کوي.
خواجه آصف سطان محمود غزنوي رحمه الله د یو اتل په توګه نه پېژني، خو د خپلې ادعا په خلاف یې بیا پر خپلو دفاعي مزایلو د محمود غزنوي نوم ایښی ده. خواجه آصف وښودل چې یا خو له تاریخي واقعیتونو نا خبره دی، یا هم له هند سره د اړیکو ښه کولو په هدف ډیپلوماټیکه چاپلوسي کوي.
سلطان محمود غزنوي نه تنها د افغانستان او اسیا، بلکې د ټول مسلمان اُمت لپاره ویاړمن شخصیت لري، د هغه په اړه ګستاخانه څرګندونې د ټولو مسلمانانو لپاره حساسیت پارونکې دي، چې په پایله کې یې پاکستاني سیاستوال او چارواکي نور هم حیثیت له لاسه ورکوي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.