د احصایې او معلوماتو ملي اداره وايي، په ۱۴۰۲ل کال کې یې د ټول هېواد په کچه د اسان خدمت او برېښناپېژندپاڼو د ۷۶ وېش څانگو له لارې ۳ مېلیونه او ۱۲۴ زره برېښنايي پېژندپاڼې وېشلي دي، چې له دې ډلې یې ۲ مېلیونه او نږدې ۶۸ زهر نارینه او یو مېلیون او څه باندې ۵۶ زره ښځینهوو ته برېښنايي پېژندپاڼې وېشل شوې دي.
له یادې ادارې څخه په خپره شوې خبرپاڼه کې ویل شوي، پرو سږکال تر ټولو ډېرې وېشل شوې برېښنايي پېژندپاڼې په کابل کې دي، چې شمېر یې نږدې ۷۰۰ زرو ته رسېږي. تر کابل وروسته، په هرات کې نږدې ۲۸۰ زره، بلخ کې تر ۱۸۸ زره زیاتې او په ننگرهار کې شاوخوا ۱۶۲ زره برېښنايي پېژندپاڼې وېشل شوې دي.
د خبرپاڼې له مخې، همدا راز په کندهار کې د ۱۵۵ زره برېښنايي پېژندپاڼو په وېشلو تر کابل، هرات، بلخ او ننگرهار ولایتونو وروسته تر ټولوډېرې برېښنايي پېژندپاڼې وېشل شوې دي.
د یادونې وړ ده چې په هېواد کې د برېښنايي پېژندپاڼو د وېش بهیر له پیل را په دېخوا تر اوسه نږدې ۱۲ مېلیونه او ۹۰۰زره هېوادوالو ته برېښنايي پېژندپاڼې وېشل شوې دي چې په دې کې ۷ مېلیونه او ۵۰۰ زره نارینه او ۵ مېلیونه او ۴۰۰ زره ښځینهوو ته وېشل شوي دي.
که څه د احصایې ملي اداره په یو کال کې د ۳ مېلیونه برېښنايي پېژندپاڼو د وېشلو خبره کوي؛ خو خلک لا هم له دې ادارې څخه شکایتونه کوي، چې چارې یې ډېرې ورو او ان په میاشتو میاشتو کې هم نوبت نه ورځي.
څو کاله وړاندې د یوې برېښنايي پېژندپاڼې بیه ۱۰۰ افغانۍ وه؛ خو اوس یادې ادارې د یوې پېژندپاڼې بیه له ۱۰۰ افغانیو څخه ۷۰۰ افغانیو ته پورته کړې ده.
خلک د احصایې له ادارې څخه غواړي چې د کارکوونکو شمېر ډېر کړي او په لنډ وخت کې دې خلکو ته برېښنايي پېژندپاڼې ورکړي.