د احصایې او معلوماتو ملي ادارې خبر ورکړی، چې خپلو مراجعینو ته د خدمتونو په وړاندې کولو کې د لا ډېرې اسانتیا په موخه د نوبت اخیستنې انلاین سېسټم رامنځته او پرانیستلی دی.
د خبر له مخې، یاده اداره په هېواد کې د نفوسو د احوال ثبتولو د یوازینۍ او معتبرې مرجع په توګه هره ورځ په مرکز او ولایتونو کې زرګونو هېوادوالو ته اړوند خدمتونه وړاندې کوي، چې ځینې مراجعین د تابعیت په تذکرو، زېږون کارتونو او نورو اړوندو اسنادو کې د ستونزو د حل په موخه مرکزي ادارې ته هم مراجعه کوي.
د یادونې وړ ده، چې دا سېسټم د دې ادارې د معلوماتي ټکنالوژۍ ریاست د متخصصینو له لوري رامنځته شوی، چې په مرسته به یې د نوبت اخیستو برخه کې د مراجعینو ټولې ستونزې حل شي.