د افغانستان استخباراتو لویې ادارې رئیس، مولوي عبدالحق وثیق له الجزیرې نړیوالې خبري شبکې سره په مرکه کې ویلي، چې د سیمې د استخباراتو لهخوا داعش ډلې څخه د یوې وسیلې په توګه استفاده کیږي.
نوموړي ویلي، چې د اصلي داعشیانو تر څنګ مصنوعي او پروژهیي داعشیان هم وجود لري، چې د مختلفو استخباراتي کړیو لخوا رامنځته شوي او په افغانستان، سیمه او نړۍ کې د بېلابېلو موخو لپاره کارول کېږي.
ښاغلي وثیق د داعش ډلې پر وړاندې د مبارزې څرنګوالي په اړه ویلي، چې دې ډلې پر وړاندې په ټوله کې پرېکنده مبارزه او عملیات او د فعالیت ټولې برخې یې تر قوي کنټرول او نظارت لاندې ساتل شوې دي.
هغه ویلي، په افغانستان کې د داعش ډلې خسته له منځه وړل شوې، لوړ پوړي چارواکې یې بندیان، وژل شوي او یا هم ګاونډیو هېوادونو ته تښتیدلي دي. د مقاومت په نوم ډلو سره یې اړیکې او هغه تړاوونه چې دې ډلې له ځینو استخباراتي سازمانونو سره لرل، تشخیص او افشاء شوي دي او پر اساس یې ځانګړي عملیات ترسره شوي دي.
ښاغلي وثیق زیاته کړې، چې د ځینو هېوادونو لخوا داسې اقدامات شوي، چې هغه د داعش ډلې د ودې لامل ګرځي، په خبره یې د داعش غټ ښودنه، له یوه هیواد څخه بل ته د داعشیانو د انتقال نه مخنیوی او د دوی مالي سرچینې نه بندول هغه څه دي چې د دغو هېوادونو لهخوا ترسره شوي.