له ارګ څخه په خپره شوې خبرپاڼه کې راغلي، د ریاستالوزراء مقام د دفتر عمومي رئیس ډاکټر ملا عبدالواسع خادم د اسیایي هېوادونو د اقتصادي ودې د کمېټې له رئیس یون سوک هون او د کمېټې له غړو سره په ویډیو کنفرانس کې د پانګونې، اقتصادي ودې او بشري مرستو په اړه خبرې کړې دي.
خبرپاڼه زیاتوي، چې د اسیایي هېوادونو د اقتصادي ودې کمېټې رئیس ویلي، چې غواړي له افغانستان سره د اقتصادي ودې په برخه کې همکاري او په دغه هېواد کې د لمریزې برېښنا په برخه کې پانګونه وکړي.
ملا عبدالواسع ویلي، افغانستان له نړیوالو هېوادونو او بنسټونو سره د خپلو اصولو او عنعناتو له مخې د نېک تعامل غوښتونکی دی او د کورنیو او بهرنیو پانګوالو لپاره یې لازمې اسانتیاوې برابرې کړې دي. نوموړي د کمېټې رئیس ته افغانستان ته د سفر بلنه هم ورکړې ده.
د یون سوک هون په وینا، د افغانستان له نږدې لیدنې وروسته به په دغه هېواد کې د لمریزې برېښنا په برخه کې د پانګونې ترڅنګ، نور هېوادونه هم افغانستان کې پانګونې ته وهڅوي. نوموړي همدارنګه له افغانستان سره د بشري مرستو د دوام غوښتنه کړې ده.
خبرپاڼه کې راځي، چې ملا عبدالواسع د افغانستان په اړه د نوموړي د مثبت نظر او له افغانانو سره د همکارۍ له لېوالتیا مننه کړې ده.