د افغانستان د بهرنیو چارو وزارت د ایران او اسرائیلو ترمنځ په روان کړکېچ یوه اعلامیه خپره کړې او له نړۍ یې غوښتي چې د اسرائیلو روان جنایتونه باید ودروي.
د بهرنیو چارو وزارت له لوري په خپره شوې اعلامیه کې ویل شوي، چې اسرائیلو د ټولو دیپلوماتیکو نورمونو خلاف په سوریه کې د ایران کونسلگري په نښه کړه، چې ایران یې په ځواب کې پر اسرائیلو بریدونه پیل کړل.: «صهيونيستي رژيم د خپلو جناياتو په دوام د اپرېل پر لومړۍ نېټه د ټولو ديپلوماتيکو نورمونو او نړیوالو قوانینو پرخلاف د سوریې پلازمېنه دمشق کې د ايران سفارت کونسلۍ څانگه په نښه کړه، چې په ځواب کې يې د ایران اسلامي جمهوریت تېره شپه مشروع دفاعي اقدامات تر سره کړل.»
د اعلامیې له مخې، د پرو سږکال د اکتوبر راهیسې اسرائیلو په غزه کې نسل وژنه پیل کړې او د نورو هېوادونو د حریم په نقضولو سره غواړي چې د نړۍ پام پر بله خوا کړي.: «د تېر کال له اکټوبر راهيسې صهيونيستي رژيم په غزه کې تر دري دېرشو زرو زياتو ملکيانو د نسلوژنې په دوام په سيمه کې د نورو هېوادونو د حريم د نقضولو او د ناامنۍ پراخولو په پاروونکو اقداماتو هڅه کړې چې په غزه کې له خپلو جنايتونو د نړۍ پام په بله واړوي.»
په اعلامیه کې له نړۍ له موثرو هېوادونو غوښتل شوي چې کړکېچ د زیاتېدو پر ځای دې د اسرائیلو روان جنایتونه ودروي.:«د افغانستان اسلامي امارت د نړۍ او سیمې پر ټولو مؤثرو هېوادونو غږ کوي چې د کړکېچ د لا پراختیا د مخنیوي لپاره د صهیونستي رژیم د جنایاتو د درولو په موخه خپلې هڅې گړندۍ کړي.»