د ارشاد، حج او اوقافو وزارت وايي، د سږني حج په مراسمو کې د گډون کوونکو افغان حاجیانو د راستنېدنې لړۍ پای ته رسېدلې ده.
له یاد وزارت څخه په خپره شوې خبرپاڼه کې ویل شوي، سږ کال د سعودي عربستان له لوري افغانستان ته د ۳۰زره سهمیه ورکړل شوې وه.:«د سعودي عربستان له لوري د حج (۳۰۰۰۰) راکړل شوې سهمیې مطابق حرمینو شریفینو ته ټول حاجیان ولېږدول شول؛ د ارشاد، حج او اوقافو وزارت د دغې ملي پروسې د لا ښه پرمخ بېولو په منظور د هېواد د څلورو زونونو (کابل، بلخ، کندهار او هرات) د حاجیانو په مجتمعاتو، هوایي ډگرونو او نورو اړونده ځایونو کې او دغه راز په سعودي عربستان کې گڼې مختلفي کمېټې جوړي کړې وې چې د دغو کمېټو په ذریعه د حج دغه لویه پروسه په ښه ډول سره مدیریت شوه.»
د خبرپاڼې له مخې، سعودي عربستان ته د حاجیانو لېږد او رالېږد د دوو هوايي شرکتونو (آریانا افغان او کام ایر) له لوري تر سره شو، چې د حاجیانو لومړی پرواز د ذوالقعدة الحرام په اوله نېټه شروع شو او د (۹۴) پروازونو په ترڅ کې د هېواد د څلورو پروازي زونونو له هوایي ډگرونو څخه (۳۰۰۰۰) دېرش زره حاجیان سعودي عربستان ته ولېږدول شول.
په خبرپاڼه کې ویل شوي، د افغان حاجیانو وروستۍ الوتنه کې ۶۲۱ تنه و، چې د کندهار هوايي ډگر ته راورسېدل.: «حاجیانو ته په مکه مکرمه او مدینه منوره کې (مسجد حرام او مسجد نبوي) ته نږدې استوگنځایونه نیول شوي وو، چې ټولو افغان حاجیانو ته درې وخته (سهار، غرمه او ماښام) ښه مناسب او سالم خواړه ورکول کېدل او د تغذیې د کمېټې له لوري د خوړو د وېش له بهیر او کیفیت څخه جدي څارنه کېده.»
همدا راز په خبرپاڼه کې ویل شوي، په مکهمکرمه کې ۷۳۷۱ تنه او په مدینهمنوره کې ۴۸۱۶تنو درملنه شوې.:«د افغانستان د حاجيانو مرگژوبله د تېرو کلونو په پرتله او دغه راز د نورو هېوادونو په مقایسه ډېره کمه وه، چې په مجموعې توگه (۲۷) تنه حاجيان په مکه مکرمه او مدينه منوره کې د بېلابېلو پېښو له کبله وفات شوي دي چې له دې جملې څخه دوه تنه په ترافیکی پېښه کې، یو تن د لوړ فشار لرلو له امله، یو تن د زړه د تکلیف له وجې، یو تن د شکر تکلیف لرلو له کبله، یو تن د گرمۍ د شدت له امله او پاتې (۲۱) تنه د طبیعي مرگونو له کبله وفات شوي دي.»
په نورو کلونو کې به افغان حاجیانو شکایت کاوه، چې پیسې ترې ډېرې اخیستل کېږي؛ خو د نورو هېوادونو په شان افغان حاجیانو لازمې اسانتیاوې نه لري؛ سږ کال تر اوسه د افغان حاجیانو کوم شکایت ثبت شوی نه دی.