په دې وروستیو کې د پاکستان د پوځ مشر جنرال عاصم منیر واشنګټن ته سفر وکړ، د نوموړي تر سفر وروسته، اوس به د اګسټ میاشتې په ۲۵ او ۲۶مه نېټه اسلام آباد د افغان حکومت د شعوري مخالفینو کوربه وي؛ د اسلام آباد غونډه پدې دلالت کوي چې یاد مخالفین پخوا د امریکا له لوري د افغان ملت پر وړاندې استفاده کېدل، خو اوس به د پاکستاني پوځ د ګټو خوندي کولو لپاره د یوې لوبیزې وسیلې په توګه وکارول شي.
د افغان حکومت مخالفین چې ځانونه د ملت استازي ګڼي، اوس د واشنګټن او اسلام آباد د مشترکې اجنډا مطابق د افغان ملت او ملي منافعو پر وړاندې دریځ نیسي. دوی هماغه پاکستان ته د مرستې لاس غځوي او په لمنه کې یې ځانونه غورځوي چې په تېرو شلو کلونو کې یې په زرهاوو بې ګناه افغانان له پاکستان سره د خیالي دښمنۍ پالنې په هدف په شهادت ورسول، په سلهاوو کلي یې بمبارد کړل، مدارس او مکاتب یې ویجاړ کړل او په ډېرو ولایتونو کې یې په دې نوم عام وژنې وکړې.
که چیرته د افغان حکومت مخالفینو افغاني غیرت او ويښ ضمیر لرلی، نن به یې د خپل ملت پر وړاندې د مبارزې لپاره پاکستان د سنګر په توګه نه انتخاباوه، د دوی دا حرکت په دې دلالت کوي چې دوی ته خپلې شخصي مادي ګټې او اهداف مهم دي. د افغان حکومت دغه ډله مخالفین د مادي ګټو په وړاندې هر څه پلوري او هر کار ته اماده دي، ولو که د افغان ملت پر وړاندې د هر چا شوم پلان وي، دوی یې تطبیق کوي.
د افغان حکومت مخالفین د خپل فعالیت لپاره مناسب چاپیریال نه لري، په هغو اروپايي هېوادونو کې چې دوی پخوا فعالیتونه پکې درلودل او غونډې یې پکې کولې، هغه هېوادونه ورځ تر بلې له افغان حکومت سره د راوبطو رامنځ ته کولو په حال کې دي، یاد هېوادونه له افغان حکومت سره ډیپلوماټیک تعاملات لري او ورځ تر بلې دا تعاملات پرمختګ کوي. دا چې د افغانستان مخالفین خپلې ځالې یوه په بله پسې له لاسه ورکوي، نو له همدې کبله هرې خوا ته لاس اچوي، د هر چا غیږې ته ځان ور اچوي، د بېلابېلو لوریو د شومو اهدافو او پلانونو ښکاري ګرځي او تر پخوا لا زیات د افغانانو په وړاندې استفاده کېږي.
شعوري مخالفین باید په دې پوه شي، چې افغانان نور په تشو شعارونو نه غولېږي، افغان ملت اوس په دې ښه پوهېږي چې دا خلک پخوا د واشنګنټن مامورین و، اوس د پاکستان لپاره ماموریت پیلوي او د اسلام آباد د اهدافو ښکار ګرځي.
که چیرته د اسلام آباد په غونډه کې د ګډون کوونکو شعوري مخالفینو په شخصیتونو باندې ژور فکر وکړو، ډېره ناسمه سابقه او تاریخ لري، د دوی په لیست کې هغه اشخاص هم دي چې د جمهوریت پر مهال یې د موقف او څوکۍ د لاسته راوړلو لپاره د عزت او حیثیت قربانۍ هم ورکړي دي، هېڅ افغان د داسې کم اصله، کم ظرفیته او منفورو اشخاصو ملاتړ نه کوي، بلکې په نوم یې لا هم شرمېږي. نن همدا منفور اشخاص ځانونه د عزتمند افغان ملت استازي معرفي کوي، خو افغان ملت ډېر دروند او با وقاره تاریخ لري او له داسې پلورل شویو څهرو څخه کاملا بري دی.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.