د افغان حکومت ویاند مولوي ذبیحالله مجاهد پر خپله اېکس پاڼه لیکلي، چې پاکستان پوځي رژیم له لوري تېره شپه په کونړ او پکتیکا کې هوايي بریدونه د افغانستان پر وړاندې «تجاوز او ظلم» دی او افغانان به د دغو بریدونو پر وړاندې مناسب ځواب ورکړي.
مجاهد زیاتوي، چې افغان حکومت د پاکستاني پوځي رژیم دغه بریدونه په کلکو ټکو غندي او دا د جنایتونو تکرار بولي. نوموړي ویلي، پاکستانۍ نظامي کړۍ په خپل هېواد کې د امنیتي ناکامیو د پټولو او له هغو څخه د خلکو د پام اړولو په موخه یو ځل بیا پر داسې اقداماتو لاس پورې کوي.
د افغان حکومت ویاند ټینګار کړی، چې د افغانستان پر خاوره د پاکستاني پوځ دا ډول بریدونه به بېځوابه پاتې نه شي او افغانان به د دغو اقداماتو پر وړاندې مناسب ځواب ورکړي.
مجاهد ویلي، د پوځي رژیم په تازه بریدونو کې په کونړ کې یوه ښځه او دوه نارینه شهیدان شوي او دوې ښځې او دوه نارینه ټپیان شوي، چې د نوموړي په وینا، ټول ځایي ملکي اوسېدونکي دي.
د نوموړي په وینا، په پکتیکا کې هم پر یوه کور او یوه سیمهییز دوکان بمبار شوی، خو په دغه برید کې ځاني زیان نه دی اوښتی.