باوري سرچینې وایي، چې د افغانستان د لومړني ستورمزلي او پیلوټ عبدالاحد مومند، جنازه به سبا (دوشنبه، د چنګاښ ۱۵مه) د جرمني له مونشن ښار څخه کابل ته راولېږدول شي.
د سرچینې د معلوماتو له مخې، د مرحوم مومند جنازه به د افغان حکومت د بهرنیو چارو، دفاع او ترانسپورټ او هوايي چلند وزارتونو په همغږۍ کابل ته را ولېږدول شي.
ټاکل شوې ده، چې د نوموړي د جنازې او تدفین مراسم به هم په همدې ورځ په کابل کې ترسره شي. په دغو مراسمو کې به د افغان حکومت یو شمېر مسؤلان، د مرحوم عبدالاحد مومند د کورنۍ غړي، خپلوان او ګڼ شمېر هېوادوال ګډون وکړي.
عبدالاحد مومند د افغانستان لومړنی ستورمزلی و، چې د ۱۳۶۷ لمریز کال په ترڅ کې یې فضا ته تاریخي سفر ترسره کړی و او د هېواد د علمي او هوايي تاریخ له مهمو شخصیتونو څخه ګڼل کېږي.