د افغانستان د اوسپنې پټلۍ اداره وايي، د روان کال په وري میاشت کې یې ۳۵۲زره ټنه توکي لېږدولي او وارد کړي دي.
له یادې ادارې څخه په خپره شوې خبرپاڼه کې ویل شوي، د وري میاشتې له لومړۍ نېټې څخه تر پایه د افغانستان اوسپنې پټلۍ له لارې (۳۵۲۹۴۰) مټریک ټنه انتقالات شوي دي.: «د حیرتان اوسپنې پټلۍ له لارې (۲۶۸۹۳۶) ټنه، د آقینې اوسپنې پټلۍ له لارې (۳۹۷۰۳) ټنه، د تورغونډۍ اوسپنې پټلۍ له لارې (۴۳۰۱۱) ټنه او د خواف-هرات اوسپنې پټلۍ له لارې (۱۲۹۰) ټنه انتقالات چې ټولټال (۳۵۲۹۴۰) ټنه نفتي، غیر نفتي ، معدنې ډبرې او نور مواد دي، هېواد ته وارد او صادر شوي دي.»
د خبرپاڼې له مخې، د انتقالاتو له ډلې یوه برخه صادرات او ټرانزیټ دي، په وري میاشت کې له هېواد څخه (۵۹۲۹) مټریک ټنه صادرات او ټرانزیټ شوي چې د صادراتو لویه برخه وچه مېوه، د انارو جوس او معدني ډبرې دي.
په خبرپاڼه کې له سوداگرو غوښتل شوي، که غواړي خپل سوداگریز توکي په خوندي، ارازانه او چټکه توگه د اوسپنې پټلۍ له لارې ولېږدوي، نو د کابل په گډون په ولایتونو کې دې له یادې ادارې سره اړیکه ونیسي او دوی به یې سوداگریز توکي بهر ته ولېږدوي او یا به یې هم وارد کړي.:«د افغانستان د اوسپنې پټلۍ اداره هڅه کوي، ترڅو د لا زیاتو انتقالاتو لپاره مناسب شرایط برابر او سوداگرو ته اړینې اسانتیاوې چمتو کړي.»
د خبرپاڼې له مخې، د انتقالاتو ډېره برخه د حیرتان، روزنک، تورغونډۍ او آقینې بندر له لارې شوې ده.
اوسمهال په ټول هېواد کې شاوخوا ۲۳۰ کیلو متره د اوسپنې پټلۍ فعاله ده او هره ورځ له دې لارو هېواد ته بېلابېل توکي را لیږدول کېږي.