د ایران د خراسان ولايت والي خبرداری ورکړی، چې که ایران د صنعت د ودې په برخه کې ګړندي ګامونه پورته نه کړي، کېدای شي له افغانستان وروسته پاتې شي.
د ایسنا خبري اژانس د راپور له مخې، غلام حسین مظفري په یوه غونډه کې ويلي، چې افغانستان په چټکۍ سره خپلې صنعتي وړتیاوې پراخوي او دا مهال شاوخوا ۱۶۰ تولیدي فابریکې د پولې هاخوا فعالیت لري.
نوموړي ټینګار کړی، چې د پرېکړو ځنډول کولی شي، د ایران اقتصادي فرصتونه له منځه یوسي او په وينا یې که دا حالت دوام ومومي نو افغانستان به د صنعت په برخه کې له ايران مخکې شي.
ياده دې وي، چې په وروستيو څو کلونو کې افغانستان په صنعتي برخه کې د پام وړ پرمختګ کړی او دا مهال سلګونه لویې او وړې فابريکې د هېواد دننه په تولید بوختې دي.