د کرنې، اوبولګولو او مالدارۍ وزیر مولوي عطاءالله عمري په رسمي بلنه، د ایران د کرنې وزیر غلام رضا نوري قزلجه په مشرۍ لوړپوړی پلاوی، چې د دغه وزارت یو شمېر مرستیالان او تخنیکي مسؤلان هم پکې شامل دي، کابل ته رارسېدلی دی.
د کرنې، اوبو لګولو او مالدارۍ وزارت د کرنې او مالدارۍ مرستیال مولوي صدراعظم عثماني او د دغه وزارت یو شمېر مسوولین د یاد ایراني پلاوي د هرکلي لپاره د کابل هوايي ډګر ته ورغلي وو.
ټاکل شوې، چې د ایران د کرنې وزیر او ورسره مل پلاوی به د کرنې، اوبو لګولو او مالدارۍ له وزیر او د افغان حکومت له یو شمېر نورو مسوولینو سره په لیدنو کې د کرنې او مالدارۍ په برخو کې د همکاریو د پراختیا، د تجربو د تبادلې او د دواړو هېوادونو ترمنځ د اړیکو د لا پیاوړتیا په اړه خبرې وکړي.
دغه راز له ایران څخه راغلی یاد پلاوی به د افغانستان د کرنې او مالدارۍ په نړیوال نندارتون کې هم ګډون وکړي.