د ریاست الوزراء اداري مرستیال مولوي عبدالسلام حنفي په افغانستان کې د ایټالیې له سفیرې ناتالیا کوینتاویل سره لیدلي او د دواړو هېوادونو ترمنځ یې د اړیکو په پیاوړتیا خبرې اترې کړې دي.
له ارگ څخه په خپره شوې خبرپاڼه کې ویل شوي، په دې لیدنه کې ناتالیا کوینتاویل ویلي، اوسمهال په افغانستان کې بشپړ امنیت او په بېلابېلو برخو کې یې د حکومت لاستهراوړنې افغانستان ته د سفر پر مهال ولیدې.:« ایټالیا په افغانستان کې د پروژو د عملي کولو غوښتونکې ده او د روغتیا، اوبو او حفظ الصحې او دوه اړخیزو اړیکو په برخو کې همکارۍ ته چمتو ده.»
د ریاست الوزراء اداري مرستیال ویلي، د افغانستان اسلامي امارت د تعامل او متقابل درناوي پر بنسټ د اروپایي او د نړۍ له نورو هېوادونو سره د نېکو او حسنه اړیکو غوښتونکی دی او په افغانستان کې د ټولو پانگونو هرکلی کوي.:«په افغانستان کې د سرتاسري امنیت تأمین، د نشهیي توکو او اداري فساد لمنځه وړل د اسلامي امارت له لاسته راوړنو څخه دي؛ دغه راز هېڅ شخص یا هېواد ته اجازه نه ورکوي چې د افغانستان خاوره د نورو هېوادونو د امنیت پر خلاف وکاروي.»
د افغانستان بانک هم ویلي، چې یاد بانک چارسمبالي رئیس هدایت الله بدري د ایټالیې له سفیرې او مل پلاوي سره لیدلي دي.
له یاد بانک څخه په خپره شوې خبرپاڼه کې ویل شوي، په دې لیدنه کې ښاغلي بدري د هېواد د اقتصادي وضعیت، افغانۍ د ثبات ساتنې پر عواملو، بانکي سکتور د وضعیت، اسلامي بانکوالۍ د پراختیا، مالي شمولیت او یو شمېر نورو اړوندو موضوعاتو په اړه مفصلې خبرې کړې او زیاته یې کړه چې د افغانستان بانک د قوانینو او مقرراتو په رڼا کې د نړۍ له ټولو هېوادونو، مالي او بانکي بنسټونو سره د غوره اړیکو غوښتونکی دی او په تېرو څه باندې دوه نیمو کلونو کې یې دا اړیکې په ښه ډول پاللې دي.