لیکوال: انجنیر وحید عمر
احمدشاه مسعود د خپل اقتدار په نشه کې دومره ډوب و چې ټوله مبارزه یې په سیاسي ډیلونو او پروټوکولونو بناء وه.
په شننیز ژورنالیزم کې د پولیترز جایزې ګټونکی او په 1989 کال د واشنګټن پوسټ ورځپاڼې اجرایوي مسؤل (سټیوکول) خپل یادښتونه د کتاب په بڼه را ټول کړي چې (GHOST WARS) نومېږي.
نوموړي له 1989 کال څخه تر 1992 کال پورې د افغانستان حالات څارل او په تړاو یې مستند اسنادو او لاسوهنو ته لاسرسی درلوده.
سټیوکول په خپلو یادښتونو کې لیکي: د 1984 کال له پای او د 1985 کال له پیل سره احمدشاه مسعود ته له بهره نسبي مرستې ورسېدلې؛ د بریتانیا څارګرې ادارې چې په اسلام اباد کې یې د بریتانیا د سفارت د یوې کړکۍ نه لرونکي خونې څخه یې فعالیت کاوه، د جګړې له پیله یې له مسعود سره اړیکې لرلې، یادې ادارې مسعود ته پېسې او یو شمېر وسلې ورکولې، په دې سربېره یې د استخباراتو وسایل هم د هغه په اختیار کې ورکول.
همداراز په دې کتاب کې یې لیکلي چې: د بریتانیا استخباراتو د مسعود باوري مرستیالانو لکه د بهرنیو اړیکو مسول عبدالله عبدالله ته انګریزي ژبه ور زده کوله، فرانسویانو هم له مسعود سره نږدې اړیکې لرلې؛ د سي آی اې(CIA) له قوانینو ازاد چې په افغانستان کې یې په سفرونو بندیز لګولی و دواړو څارګرو ادارو ددې بندیز سربېره هم خپل افسران د خبریالانو په جامه کې پنجشیر ته لېږل، مګر بیا هم CIA په هغو ريپوټونو ډېره تکیه کوله چې د برتانوي جاسوسانو له لوري دوی ته ورکول کېدل.
لیکوال زیاتوي چې “امریکایانو احمدشاه مسعود ته د افغان سایمن بولیوار او جورج واشنګټن په سترګه کتل”.
سایمن بولیوار د جنوبي امریکا یو جنرال و چې په 1783 کال کې د خپلې خاورې د ازادۍ لپاره جنګېده.
او جورج واشنګټن د امریکا لومړنی ولسمشر و چې په امریکا کې د جوکراسۍ او جمهوري نظام باني ګڼل کېږي.
د لیکوال په وینا، مسعود د بریتانیې او فرانسې له جاسوسانو سره ډېر غوره چلند کاوه، نوموړي د نورو افغانانو په پرتله فیشني جامې اغوستلې او په فرانسوي ژبه روان غږېده.
د مسعود ورور ضیا مسعود بیا له CIA سره له نږدې کار کاوه، نوموړي له دې ادارې سره منلې وه چې یوازې به د سي ای ااې له لارې افغانستان کې فعالیت کوي.
د 1984 کال په ورستیو کې CIA بې له دې چې پاکستان په جریان کې واچوي له احمدشاه مسعود سره یې په نېغه تماس نیوه او مرستې یې ورسره کولې.
کله به چې جګړه سخته شوه او له احمدشاه مسعود سره اکمالات کم شول نو د خپلو ورونو له لارې به یې چې له پخوا یې پېښور، واشنګټن او لندن ته لېږل او دغسې معمولا د مرستو د ترلاسه کولو لپاره تل همدې ځایونو ته استول ترڅو له پاکستاني جنرالانو او د CIA له افسرانو پیسې او وسلې ترلاسه کړي.
په دې سربېره چې پیسې او وسلې به یې غوښتې، نو احمدشاه مسعود به د خپلو جنګیالیو لپاره د ویټامن ګولۍ هم غوښتې ترڅو یې جنګیالي په ګېډه ماړه وي او تر اوږدې مودې د لوږې احساس و نه کړي.
همدا ډول یې د ایکسرې ماشینونه غوښتل چې خپل ټپیان پرې تشخیص او معالجه کړي، ددې ترڅنګ یې د شپې لخوا د بنفشه infra_red عینکې او نښه ویشتونکي وسایل هم غوښتل.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.