بعيده به وي، چې د تاريخ په تېر يون کې دې داسې حکومت او يا هم یو سيسټم په سیمه، ګاونډ یا نړۍ کې رامنځ ته شوی وي، چې ټول ولس او خلک ترې راضي وي، ځکه داسې حکومتولي ناممکنه ده، افکار او آندونه مختلف دي، هر څوک د خپل ځان او خپلې خوښې ځای او مسؤلیت په غوښتلو سره له واکمنو چارواکو خپلې ځانګړې غوښتنې لري، چې د ټولو تحقق محال ده.
خو له دې سره – سره چې افغانستان د حکومتونو له اړخه د بدلونونو يو اوږد تاريخ لري او په وروستيو لسیزو کې يې د بدلونونو اصلي عوامل دلته د بېرونیو افکارو یرغل او ځینې وخت مظالم وي.
په وروستيو څه باندې دوه لسيزو کې د قدرت جزیرو، فساد او نورو ډېرو ناخوالو دې ته لار هواره کړه، چې افغان مؤمن او مجاهد ولس د وخت واکمن حکومت په يوولس ورځو کې نسکور او چارواکي یې د هېواد پرېښودلو ته اړ کړي.
په افغانستان کې د طالبانو له څه باندې درې کلنې واکمنۍ سره چې د دوی په ضد جریانونو په ټوليزه توګه په ټولو برخو کې ماتې خوړلې او منلې ده، اوس یې د همدې واکمن حکومت په خلاف د دروغو او شايعاتو خپرولو ته مخه کړې ده.
دا جريانونه چې هسته یې په بهرنيو هيوادونو کې ده، په سيستماتيکه توګه هره ورځ د طالبانو پر خلاف د خوځښتونو او بریدونو ادعا کوي، په داسې حال کې چې د دوی د بريدونو خپلواک پخلی تر اوسه نه هم کوم داخلي افغان وګړي، د نړيوالو جګړو د ثبت کوم مؤثق دفتر، بې طرفه نړيوال سازمان او يا هم د نړيوالو لسګونو رسنیو په شتون کې کومې مؤثقې او د ژورناليزم اصولو ته ژمنې رسنۍ کړی ده.
نه تنها چې د دوی د بریدونو تائید نه کېږي، بلکې دا هم لا تر اوسه نه ده منل شوې، چې دوی دې په هېواد کې يوه لوېشت ځمکه تر خپل حاکمیت لاندې ولري او په جبهه یي توګه دې مبارزه وکړي.
د طالب ضد جريانونه په ورځني ډول د ناکامو ادعایوي بریدونو په اړه، په تبلیغاتي بڼه نشرات کوي. د شر او فساد دغه تبلیغاتي هڅه يواځې د شته بې نظيره امینت د اخلال، د بغاوت لپاره د بهرنيو هېوادونو د ملاتړ او مرستو ترلاسه کولو، همدا راز د پرمختګونو او بهرنيو پانګوالو او سوداګرو د مخنيوي لپاره ترسره کېږي.
اوس د دوی پروژې تر ډېره تبلیغاتي دي، ځکه په فزیکي ډول یې له ماتې سره ټول زور تر رسنیو او تبلیغاتي فعالیتونو پورې منحصر شو، چې له دې لارې غواړي خپلې هغه سیاسي او نظامي خامیانې او د اختلافاتو موارد پټ کړي، کوم چې په تېرو دريو کلنو کې تر بل هر څه ډېر بارز وو.
هم مهاله د طالبانو ضد ډلو يوه بله هڅه د شايعاتو په خپرولو سره دا ده، چې دوی د افغانستان په ګاونډيو او سیمه ییزو هېوادونو کې د نورو ډلو لخوا له د ترسره شویو بريدونو ربط او اړیکه افغانستان ته ورکوي.
دوی د همدې شايعاتو په خپرولو سره غواړي سیمې او نړۍ ته واضح کړي، چې د طالبانو تر کنټرول لاندې افغانستان په سیمه کې د نا امنۍ رامنځ ته کوونکو ډلو لپاره يو خوندي بستر دی او اړتيا ده چې د همدې ډلو په وړاندې د مبارزې لپاره له دوی څخه ملاتړ وشي.
د شايعاتو د خپرولو له لارې د طالبانو ضد جريانونه همدا راز غواړي، هغه اندازه پيسې چې دوی یې له خپلو بادارانو څخه د افغانستان د نا امنه کولو او د پردیو موخو د تحقق په موخه ترلاسه کوي، د همدې ناکامو او خیالي بريدونو په ادعاوو او رسنیز شور جوړولو سره حېف او مېل کړي.
د طالبانو ضد جريانونه د شايعاتو په خپرولو سره د يوې بلې موخې ترلاسه کولو په تکل کې هم دي؛ دوی اکثراً د پرځېدلي ادارې د عسکرو د وژنې خبرونه هم وخت نا وخت خپروي، هغه عسکر او نظامي پرسونل چې د طالبانو لخوا د جمهوريت د وخت پاتې معاشات هم ورکړل شوه، په داسې حال کې چې هماغه وخت د طالبانو په ضد جنګېدل.
دا ډلې د همدې شايعاتو په خپرولو سره غواړي، چې د خپل جريان لپاره خواخوږي پیدا کړي، ځکه د افغانستان په ولس کې هيڅ خواخوږي او ملاتړي نه لري، دوی غواړي د ويرې د خپرولو له لارې عام وګړي ور جلب کړي.
د طالبانو په ضد د بغاوتګرو د شايعاتو له خپرولو څه باندې درې کاله تېر شول، که چیرته د شر او فساد لخوا په هره برخه کې د خپرو شویو شايعاتو ۱۰ سلنه هم سمه وای، نو شر او فساد به اوس جبهه یي جګړه کولای او سیمې به یې تر کنټرول لاندې وای.
افغان ولس ته د بغاوتګرو او نورو ټولو خیالي حرکتونو واقعي څهرې بربنډې شوې دي، چې دا خلک پر افغانستان يو لاس، قوي، مرکزي او خپلواک حکومت نه غواړي او نه یې لورېږي چې دا ولس دې په امن او سوله کې خپل ژوند ته دوام ورکړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.