د افغانستان د بهرنیو چارو وزارت په یوه خبرپاڼه کې ویلي، چې د یاد وزارت وزیر مولوي امیرخان متقي د ملګرو ملتونو د سرمنشي له سیاسي او سولې چارو مرستیالې روزمري ډیکارلو سره ټلیفوني خبرې کړې دي.
د بهرنیو چارو وزارت په وینا، په دې خبرو کې د افغان حکومت او ملګرو ملتونو ترمنځ د همکاریو پر عمومي وضعیت او د راتلونکو همکاریو د پیاوړتیا او پراختیا پر لارو چارو بحث او د نظرونو تبادله شوې ده.
د وزارت د معلوماتو له مخې، دواړو لورو د دوحې پروسې په اړه هم د راتلونکي تعامل او همکاریو پر څرنګوالي خبرې کړې او په دې برخه کې یې خپل لیدلوري شریک کړي دي.