د ترکیې د بهرنیو چارو وزیر هاکان فیدان له الجزيرې ټلويزيون سره مرکه وروسته له هغې ناندريزه شوه چې، نوموړي په کې د ايران په بهرني سياست توندې نيوکې وکړې او دغه هېواد ته په اشارې یې ویلي، که تاسې د بل هېواد د کمزوري کولو لپاره ډلې او ملېشې جوړوئ، نو نور هېوادونه به هم ستاسې په هېواد کې همداسې وکړي.
فيدان همدا راز زیاته کړې «په دې نړۍ کې هیڅ پټ نه پاتې کېږي، هر څه چې تاسې یې لرئ، نوره نړۍ یې هم لري».
د ترکيې د بهرنيو چارو وزير همدا راز ويلي چې عربان، ترکان، کردان، ايرانيان او بل هر څوک بايد په پرديو چارو کې له لاسوهنې ډډه وکړي او د بل هېواد د تسلط او لاندې کولو هڅه ونه کړي.
له بل لوري بيا د فيدان خبرو ته د ايران د بهرنيو چارو وزارت وياند اسماعيل بقايي توند غبرګون ښودلی او په خپله اېکس پاڼه یې ليکلي «څنګه چې د ترکیې د بهرنيو چارو د وزير په باور د پرديو هېوادونو تسلط تېروتنه ده، همداسې په سيمه کې د امريکا او اسرائيل په ښکاره او پټو لاسوهنو سترګې پټول هم تر هغې لويه تېروتنه ده».
بقايي همدا راز فيدان ته په غبرګون کې ليکلي چې، که ته وايې چې سيمه بايد د نورو تر تسلط لاندې رانشي او ازاده وي نو د اسرائيلو په اړه دې څه نظر دی؟.