د تېر ۲۰۲۳ کال د اکتوبر مياشتې له ۷مې نيټې چې د حماس جهادي غورځنګ لخوا د اشغالګر صهیونستي رژيم څخه د خپلو ځمکو او سیمو نيولو په موخه يو نه اټکل کېدونکی او غافل ګير هر اړخيز بريد ترسره شو، د کوم بريد ترسره کېدلو چې د نړۍ په مخکښو استخباراتي سازمانونو کې موساد هم په شنډولو او له وړاندې يې د خبر ترلاسه کولو پاتې راغی.
د هغه تاريخي او خونړي بريد له پيل سره د سېمې او نړۍ هيوادونو ته د خپلو موخو لپاره يو ګرم د جګړې ميدان پيدا شو.
د همدې ميدان له پيداوالي سره، د نړۍ د مطبوعاتو او نورو ټولو توجو د اوکراین او روسیې ترمنځ د جګړې په ځای منځني ختيځ د فلسطین او صهيونيستي رژيم خوا ته واوښته.
په دې لړ کې دوه قوي د سیمې او نړۍ ظاهري غليمان(امريکا او ايران) سره ښکر په ښکر شول؛ دې ښکرکېدلو نه يوازې چې د فلسطیني نسل وژنې د مخنيوي او اور کې کمښت راوست، بلکې په بل شوي اور يې نور تېل هم وپاشل.
د وخت په تېرېدلو سره ايران او امريکا په ظاهري توګه د دې جګړې د پای ته رسولو هڅې کولې؛ د همدې موخې لپاره د ايران د وخت د بهرنيو چارو امير عبدالهيان ۱۴ بهرني سفرونه او په ځانګړې توګه منځني ختيځ ته لاړ، خو د اختتام او کمزورۍ په ځای یې دا اور لا تازه کړ.
همدارنګه د امریکا د بهرنیو چارو وزير انتوني بلينکن هم سيمې ته ۸ سفرونه وکړل، خو دا هرڅه غوولونکي او تېر ايستونکي ځکه وو چې د ملګرو ملتونو لخوا د فلسطین او صهيونيستي رژيم ترمنځ د اوربند د مسودې رد يا ويټو رايه امريکا وکاروله او د دایمي اوربند مخالفت يې ترسره کړ.
ايران او امريکا په ګډه په سیمه کې سيالي پر مخ روانه کړې وه او دا سیالي دې ځای ته را ورسېده چې د ايران لخوا په سیمه کې د نيابتي جګړو تر ټولو د قوي ډلې حزب الله مشر حسن نصرالله تېره شپه په صهیونیستي رژيم وواژه.
د عربو د اسلامي شوری مشر وړمه ورځ له عربي ټلويزوني رسنۍ سره په یو بحث کې وژل شوي حسن نصرالله ته له وژل کېدلو ۲۰ ساعته وړاندې وويل: ايران ته خرڅ کړې، خپل وصیت دې ولیکه، زه نه شم کولای چې ووايم څنګه او په څه يې خرڅ کړې، خو ته بايد خپل خپلوان راټول او خپل وصیت دې ولیکې.
د همدې مرکې ۲۰ ساعته نه وو تېر شوي چې د صهیونستي رژيم د يو دقيق هوايي بريد په پايله کې حسن نصرالله د خپلو څو مهمو قومندانانو سره ووژل شو.
د ده له وژنې سره بیا ايران د نورو وژل شويو ايراني او لبناني مشرانو په شان د غچ اخيستنې نغارې وډنګولې، خو په حقيقت کې به هيڅ هم ونه کړي.
ايران او امريکا اوس په منځني ختيځ کې مخامخ د نورو په کورنو کې رقابتونو ته ننوتل؛ دا جګړه پراخېږي او تر ټولو ډېر تاوان به یې په منځني ختيځ کې بې وسه او د مرګ په خوب ويده عربان ګالي.
صهيونيستي رژيم به پراخه کچه سره يو په يو عرب هيوادونه ټکوي او د ايران لخوا به یې يوازې غندنې کېږي؛ هغه چې وايي د اوبو خړول او د ماهيانو نيول به پکې کېږي، همداسې حالت را روان دی.
دا سیمه به د يوې اوږدې جګړې شاهده وي، د کنټرول او تېزوالي بټنې او انتخابونه به یې له امريکا او ايران سره وي، خو د دوی نیابتي ډلې به په سیمه کې يو او بل سره خوري او دا سیمه به له غلامۍ او بدمرغيو پرته نور د هيڅ وي؛ ايران او امريکا يې هم سوله غوښتونکي، هم ننداره چيان او هم عملي د پردې ترشا د جنګېدونکو ډلو ملاتړي.
حزب الله به په څو ساعتونو کې نوی مشر وټاکي، هغه به هم توندې خبرې او اعلاميه ورکړي، خو د ايراني رژيم له غوښتنو او پاليسو به غلط ګام کېنږدي؛ دا لوبه نوره هم ګرمېدونکې ده، خو کنټرول او واک یې د امريکا او ايران په لاس کې دی.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.