لیکوال: نوین ساپی
د روان میلادي کال د جون میاشتې په دېرشمه نېټه، ټاکل شوې چې په دوحه کې د افغانستان په تړاو دوه ورځنۍ درېیمه ناسته ترسره شي، یاده ناسته به د جولای تر لومړۍ نېټې پورې دوام ومومي.
له دې وړاندې هم دوه ناستې د قطر په دوحه کې ترسره شوې وې، چې بې نتیجې پای ته ورسېدې؛ لومړۍ ناسته د ۲۰۲۳ م کال په مۍ کې جوړه شوې وه او دویمه یې سږ کال په فبرورۍ کې جوړه شوې وه چې د اسلامي امارت د غوښتنو او شرطونو د نه منلو له امله پکې ګډون نه وو کړی.
باختر اژانس د رئیس الوزرا د سیاسي مرستیال مولوي عبدالکبیر له قوله ویلي چې، د اسلامي امارت د دریځ منلو په شرط به په درېیمه ناسته کې ګډون وکړي.
د ملګرو ملتونو د سرمنشي انتونیوګوترېش استازې، روزمېري ډیکارلو کابل ته د سفر په پای کې اعلان کړی او له اسلامي امارت څخه یې د دوحې په ناسته کې د ګډون رسماً غوښتنه کړې ده؛ همهاله یاد سازمان په یوې خپره کړې اعلامیې کې یادونه کړې چې، د قطر په دوحه کې د افغانستان په تړاو د ځانګړو استازو د درېیمې ناستې موخه له افغانستان سره په ښه همغږي، منسجم او رغنده توګه د نړۍوال تعامل زیاتوالی دی.
کومې دوه غونډې چې د قطر په پلازمېنې دوحه کې ترسره شوې د اسلامي امارت استازي یې هم وربللي وو، خو د بهرنیو چارو وزارت د یوې اعلامیې په خپرولو سره یې د ګډون بلنه رد کړې وه، علت یې دا وو چې، امارت دوه غوښتنې/شرطونه درلودل:
لومړۍ غوښتنه/شرط دا وو چې طالبان به دې غونډه کې میلمانه نه، بلکې د افغانستان نماينده ګان وي.
دوهمه غوښتنه/شرط دا وو چې د دې غونډې له مشرانو سره به طالبان خاص/ځانګړی مجلس ترسره کړي.
ذکر شوې دوه غوښتنې/شرطونه د ملګرو ملتونو له اړخه ونه منل شوه، ځکه یې له ګډون کولو څخه انکار وکړ، د افغانانو لپاره بې پایلې تمامې شوې.
دا چې په تېرو دوو غونډو/ناستو کې د نه ګډون په تړاو د بهرنیو چارو وزارت اعلامیه خپره کړې وه، د یاد وزارت چارسمبالي امیرخان متقي ویلي وو: (که د دوحې په غونډه کې د طالبانو او ملګرو ملتونو تر منځ د ټولو موضوعاتو په اړه د بحث فرصت را منځ ته شي او موږ وکولای شو چې، د افغانستان استازيتوب وکړو، په دې صورت کې بيا دا غونډه يو ښه فرصت دی).
نو په دې هیله چې په راتلوونکې درېیمه غونډه کې د طالبانو او ملګرو ملتونو ترمنځ، د مهمو موضوعاتو په اړه بحث او خبرې اترې ترسره شي، بیا نو طبعي ده چې د افغانانو لپاره مؤثره تمامه شي.